حمق وأنا صاحي

شربوني لحماق
ف كيسان ديال النفاق
حيت كنت باغي الزواق
حيت وصفوني بأبشع الأخلاق
مزال الكيسان عامرين
الوقت اللي شربوني
من تم وأنا مشتاق
وخا لا لون لا ريحة
ومزينو على مذاق
*****
حطيت يدي فوق صدري
حسيت بسكات
قلت قلبي ناعس
لا
يمكن يكون مات
لقيت ضلعة مهرسة
هي اللي حابسة ليه الدقات
حيت وساخ الدنيا
كل نهار معرسة
وقلبي ورقة بيضا
لكن ، يا حسرة خوات
*****
شوفة بين عيني
فيها دمعة حرة
تزنكات سخانتي
وترخاو يدي
الدم وسط عروقي
جمدت به الهدرة
وخا حرارة شوقي
تكمشات ديك الزهرة
فكل نظرة تفيق جروحي
الحب غير الحب
وما باقي ساكن فقلب
زعمة أنا اللي عليت صروحي
الناس اللي حداي بي ما حسوا
قد ما متنت حلامي علي تهرسوا
لا صحيب ولا قريب
الوردة يطول زمانها تعيب
نهار تكون الكلمة مسكدة
يلا خداك لقضا ما تجيبك معاندة
داك الشي علاش نعاسي أنا ما جا
حيت هرب نهار ناضت لعجاجة
*****
قالول الليل فيه حكمة
كو كان الليل دواي
ما راه فرج الغمة
كو كانوا الىناس معاي
ما نشعر بصدمة
تقييت وكليت
درت يدي على فمي
ما نشرب كيسان ما نسيل دمي
اللي خبعتو فراسي
داه لي نعاسي
واللي يقرب
يفيض عليه وسواسي
بغيت نقرا كفي
نعرف منو وصافي
عقل يقولي زيد
لاخر يقولي صافي
اللي تكتب تكتب
وخا عمري كلو شاعل عوافي
*****
دقيت بزاف ديال البيبان
عسى شي شمعة تبان
بقيت هاكا من باب لباب
لا ردان لا جواب
رجعت لور وبكيت على حالي
تصدمت وتخلعت
حيت كلموني جوج دميعات
ما بغيتش نحكيلهم اللي فبالي
هربت بعيد
دخلت فجوفي
هربت من معرفة الناس
وقاصح لمعاودة
وخا نعتوني بالصوفي
لقيت نفسي لي مساندة
أنا راضي باللي أنا فيه
وخا كيقولوا شفيه في قفيه
نهار يقراو الحياة
ويوصلوا لمكانتي
يعرفوا معنى لجراح
أنا ما حاقد حد وسط لقوافي
*****
نكتب حزاني ف جوج جرحات
الدم منهم يسيل على شدوقي
القصيدة تعفنات
حتى كلمة ما صحيحة
وحدة تنفخات .. وحدة تقيحات
وحدة ماتت .. وحدة تكفنات
كاع الناس عارفين
ويدوروها ضحكات
واللي بحالي جايفين
يتسناو الممات
ما يعرفوا نواح
ما يفهموا غوات
يمكن أنا اللي فاهم
داك الشي علاش كيقولوا منو خرجات
حسيت براسي شوية
وقفت وقفة مسكدة
وهما يتقضاو لي
ما بقيت فاهم والو
واش أنا .. هي .. هو
وكيفاش جرالو
قلت يمكن عاد بدا الكاس يخدم في
حسيت بدوخة ماشي عادية
تفكرت نهار سكرت بالحب والغرام
ليلة هدرت فيها بزاف
وما سمعت لحديثي كلام
يمكن بداني التلاف
من شعر راسي
لظفران رجلي
مشى إحساسي
تقضات في
ما عرفت فوقاش نفيق ونولي لطريق
عنداك غي نبقى فهاد الحالة المعمية
يا مالين الكاس وعمارتو
آش بغيتوا بي
ياك اللي ما عندو هم تولدو لو حمارتو
همي نار مكدية
*****
شفت حتى عييت
وجمعت وراقي
لقيت دمي كحال
وهجر عروقي
صفاريت صفورية الموت
وأنا حي وباقي
خرج لي عقلي ألخوت
نهار شربوني حماقي.






أسامة المسكيني.