نحلمْ كايِنّا اثنينْ

نحلم كاينّا اثنينْ

ضحكَة حْنينةْ

وسطْ الغيمْ

مرّه انتِ تولّي سحابهْ

مرّه أنا نولّي غابه

مرّه نطيرو بْلا جِنْحينْ


نحلمْ راني ديمه نحلِمْ

سْحابه كْبيره

كبيره برشه

أكبرْ مالغولْ وِ التّنّينْ

أكبرْ من خوفْ الحطّابه

أكبرْ مني

أكبرْ منّكْ

أكبرْ منّا نَحّنَ الكلْ

أكبرْ من خوفْ الخايفينْ


نحلم واللّه ديمه نحلمْ

نحلمْ أنا طُفله صْغيره

بْروبه حمرا

وْ شعري ضْفيره

فْ يدّي يَــــــمّه

ما تْفارقني

عروسة وْ حِلّمه

ما تْفيّقني

لا تفيّقني

نحبّكْ يمّـــه

وينكْ يَمّــه

اجريلي يمّه

حلمي راهو

زادْ غرّقني

نحلمْ كاينّا اثنين

يدّي ف يدّكْ

حلمي حلمك

ويني يدّكْ ؟

ضاعتْ يدّكْ

ايدينا ضاعتْ وسطْ الزّحمه

أسوارْ كبيره بيني وْ بينكْ

قلّي أنا كبرتْ عليها

ولآ الحلمة أكبرْ منّا

حلمة بيضه وسطْ الغيمْ


كان يما كان

ثمّه و ثمّه

ثمّه مدينه بلاشي اسوارْ

جنينه مْزيّنها النّوّار

فيها يمّه عْرايِسْ حلوى

فيها يمّه حْكايه ولمّـــه

فيها يمّه

تزرع كلمة تنبتْ حلمه

تطلعْ أفوحْ مالنّوّارْ

وانا وانت وِسْطْ الحلمه

نْطيرْ نْحلّقْ بْلا جنحينْ

انت مرّه تولّي غابه

أنا مرّه نولّي سحابه

مرّة نولّوا غناية حنينه

ضحكة تجلّي ظلام الغيمْ


الثلاثاء 9/7/2008
الثامنة والربع صباحا




..