شْمْسْ الفْرحَة
مْشَاتْ رْوَايتِي بينْ النَّاسْ دُونْ رَاوي
ظنيتْ مْلقاكْ يْداوِي
غبرْ كفِّي فْ عْيُونْ بْهَاكْ
وْ رْجعْ خَــــــــاوِي
* * *
رْمِيتْ الحْظ فْ بِيــــــرْ مَالِيهْ قــَــــاعْ
وْدْرتْ مْنْ النْجُوم شهُــــودِي
تْهتْ بينْ مْوَاجْ الرْجَا مْنْ غيرْ شرَاعْ
وْتسنِّيت سْنين، عَسَى تعُودِي
* * *
مْنازلْ لغيـــــَــــــــــابْ عْلِيَّ تْـتنَاوْبْ
الدْرْبْ اللي خْدَاكْ، نْسَالو مَا يْجَاوْبْ
اشْ خلا هـْـــــــرُوبْكْ فِيّ
قلبْ مْهْجُورْ، سْكنَاتُو الكِيّة
* * *
زْرتِينِي فْ مْنَامِي، وْكنْتِي عَاليَة
وْكانْتْ الشمُوسْ تْضوِّي بْنوَارْكْ
زرْتينِي فْ شرُودِي كِيفْ الدَّاليَة
شـَـــــــــــامْخَة تتمَايْلِي بْزهَارْكْ
* * *
مَازَالْ اثارْ قدَامْكْ نشُوفْهَا
فُوقْ رْمَالْ الخَاطْرْ
مَازالْ مَحَاسْنكْ بْصْـنُوفْهَا
فْ عْروقِي تْتقــَاطْرْ
* * *
لـُــــــــو كَانْ بْعادْكْْْْ يْنسِّي
مَا تزِيدْ شوَاقِي كلْ يـُومْ
هَكْذا نْصْبّحْ وْ هَكْذا نْمْسِّي
مْكدرْ وْجهْ سْمَايَا بْالغْيُومْ
* * *
شمْسْ الفرْحَة فِينْ نصِيبْكْ
وَاشْ مْن نْهـَـــــــــارْ تدقِّي بْوَابِي
شمْسْ الفرْحَة طالْ مْغيبْكْ
عُودِي لشرُوقكْ، يْعُودْ لِي صْوَابِي.
الرئيسية 
