قاضي راسو

موضوع: قاضي راسو 27/10/2010, 22:03

حكاية
قاضي راسو

مابِيا ما عْليا تَنَشْربْ أتايْ ف سْويقاَ
حَتا وَقْفاتْ قَدامي جوقا
ب مْلاجَا ولَمْعَنْدا دَارو حَلْقة
طالْبينْ اصحابْ طَرْقَة
ومَللي أنا فْضولي
وما خْفاكُمْ نيتْ مسَالي
قَلْتْ أعلاشْ ما نْديرْ قاضي
ونْحكَّمْ قوْلي ويَرْضاوْ بَ حَكْمي وَما جَا فْصَالي
جابو ليا شَلْيا مْرّبْعة ولَمْخازْنية رَبْعة
وكاسْ تَلْما وقَرْعة وحَطو كَّدامي سَلْعة
َرزَّة وطكية وطرْبوشْ وبِرية وكاسَكْ كبيرْ شْوية
والْخَرْقة مَادَكْروها ليا
وقََالو حْكمْ فهَادْ لْقضية
قَلْت لِيهمْ مالْكم أشْ طْرا
حمْرو وخَرْجو عينِهُمْ ف مرَّة
تْقُولْ تَيْسالُوني لَكْرَة
قَالو..........
شْكونْ سْبَقْ غطَا رَّاس ودَارْ ليهْ سَتْرة
هذا عْلاشْ نَوَضْنا هادْ لْحَْضْرة
وقْصَدْناكْ تْفَكْ لِينَا هادْ جَرة
عَرَفْناكْ رجَلْ حْكيمْ وكَتَفْلي شَعْرة
خمَّمَتْ وفكَرْتْ ورَبَعْتْ إديا فُوقْ صَّرة
وشَفْت شْمالْ ويْمينْ وسمْعو أشْ طْرا
كَلْت أش تاتْقولي أرَّزة فهادْ لَكْلامْ
قالَتْ سمَعْ أمولايْ لْحَقْ بايَنْ حتَا ف ظلاَمْ
أنا عَنْدي تاريخْ ماشي مَشْرياَ ف لْعرامْ
سوْلو عليا فُرْسانْ لْعربْ
ولْجاحظ وما ألَّفْ وما قْرا منْ كْتابْ
سَوْلو عْليا بن خلدون وبن سينا
سوِلو عليا بغداد وفاس وجامَعْ زيْتونة
سولو عليا ابن بطوطة والشاطبي
والرازي والفرابي
وسولو عليا ابطالْ الاسلامْ ولمجادْ
وسولو اش من فتوحاتْ مع طارقْ بن زيادْ
أنا الوقارْ وصرامة
أنا لَمْغطية رؤوسْ لْعُلامة
وهادو أشْ هُومَا
عَراوْ رَّاسْ ومْشاتْ لْهمَّة
القاضي ......
ونْتِ يا طاكية خْتصْري ف لْقَولْ
أنا يا سيدي لْفنْ ولْ أوصُولْ
أنا لْجمالْ ولْباسْ لْمكْمولْ
أنا لْبهْجاوية ف عالمْ نْصولْ
أنا لَوْحة لْفنية ولْحرْف لْمشكولْ
القاضي ......
وانت يا طرْبوشْ تكلمْ ودافَعْ
أنا يا مولايْ ف حفلاتْ نافَعْ
أنا لْهيبة وفجْمَعْ رافَعْ
أنا الباشا بيا نجْمُ ساطَعْ
أنا الاندلس وبن عبادْ والادبْ
أنا لْموالْ والألة ورْبابْ
أنا الافراحْ والمناسباتْ
أنا لْملْحونْ وسهراتْ
القاضي ...
ونْتِ يا لْبرية ... أنا الامْنْ والامانْ
أنا الساهْرة وناسْ نيامْ
أنا لْحامية لْمظلومْ مَنْ ظلامْ
أنا لْهبة لْوطنْ
أنا رافْعَ لَعلامْ وسَلامْ
القاضي ......
.وانتَ يا كاسَكْ بْلا حشمة بْلا حْيَا
هازْ صبْعكْ بْغيتي دافَعْ علْ لَمْية
أنت سمَعْتْ عليكْ شي حْديتْ
راسْ بدلتي ليهْ شوفة واشْ هادْ لكلامْ صْحيحْ نِيتْ
النظْرة فيكْ مع للبَاسْ معْدوفة
وجيتي لَراسْ مَفْروضْ وبَزْمَنا
وبلْحرارة سَخنتِ لينَا رْيوسَنا
وف شوارعْ تْكُّولْ من لْمناجِمْ خرْجْنا
كلامكْ مرْفوضْ ما عَنْدو معْنى
الكاسكْ.....
أنا شِعاري أنعامسْ
هوَ لْمحافظة علَ راسْ
اللهْ إحْفَظْ من تهْراسْ
ولاقَدرْاللهْ نحْمي الباسْ
وللي سْمَعْتِ ما عَنْدو أساسْ

القاضي ......
بعدْ ما سْمَعْنا غايَتْنا منْ قصتْنا
الرَّزة تبْقى تاريخ و صورة عَنْدنا
والطاكية لَعرسنا و لْفَرْحنا
وطرْبوشْ نخوة يومْ عيدْنا
ولْبرية نحْترْموها وتحْترَمْنا
والكاسكْ من هاد لكسايد وقاية لْْْريُوسْنا
ولْخرْقة للي ماذكْروها سَتْْرة لبْناتْنا
ولعنْدو شي شغَلْ إجمعْ راسو وبَسَعْ منَّا

البعليوي عبد السلام

موضوع: رد: قاضي راسو 29/10/2010, 21:35

نص جميل بصوره الفنية
قد امتعنا بمستواهـا الشاعـر البعليوي عبد السلام حاول من خلالهـا
توظيف وزن تصوره في استحضار شهادات ـتأكيد وجودي لمختلف
الرموز التي خاطبهـا خياله ومدى تفاعـل المتلقي في حب امتلاكها
مستعينا بجماليتها في مناسبات اجتماعية
دمت مبدعا ودام لقلمك التميز
تحيتي الخالصة

موضوع: رد: قاضي راسو 5/11/2010, 21:34

حكي بنكهة بوعيلوية خاصة تستحضر الثرات الشفهي الغني بما يحمله من حكم من واقع الحياة اليومية في نفس يأخذ حتى أخر حرف ...شكرا على الإمتاع السي عبد السلام...مودتي واحترامي

» قاضي ثورية بيننا