ف شي حاجة
تنفكر
إمكن تنفكر
فيا
منين الليل إروح
علي
مع ظلمة العكبية
العين..
خابية ما تقطر
وقت لعشية
...
وحيت
أنا أنت
بنت ليك
ف مراية لغمام
تبروري طايح
على وجه الخذ
...
شعلت طريقي ليك
قرطاس الشمع
صبيت شتا
غرقت ف الكاس
مشيت بعيد
بيت نقرب حداي
...
داني واد
تفرق حزني
شعاب
تكلت مايا
...
درت راسي
ضاية ملح
مسوسة جاتني
حياتي بلا بيا
...
قهوة كحلة
بلا سكار
...
تهرس الجهد
وليت ليه عكاز
...
مشفتني منين
عيطت علي
...
دزت من الهيه
مورا ذاك الدرب
اللي فيه ساكن
دقيت الباب
ما جاوبني حد
عاود زدت دقيت
ما حليت لي
تكيت عل الحيط
تسنيتني شوية
ما بنت لي
...
غلبني النعاس
توسدت عتبة القلب
...
الصباح فقت
لقيتني مغطي بيا.
الرئيسية 
