قالوا زمان

موضوع: قالوا زمان 19/9/2010, 20:11

موسوعة الامثال المغربية
من هنا الرحلة

قالو زمان

- الدجاجة غسلت رجليها و نسات لي داز عليها.
- شد حمامك ادريس طار و خلا ليك غير الريش.
- ما يشكر عروس غير امهاأو خلتها.
- الزين عندنا سلالة من العمة الخالة.
- كفي برمة على فمها تطلع بنت المها.
- وريه وريه ويلا عمى سير وخليه.
- قالو أش خصك العريان قالو خصني خاثم.
- اعطيناك تكحل ليها ساعة عورتيها.
- الشي من الشي نزاها و شي من قلت شي سفاها.
- بني وعلي وسير أو خلي

...

موضوع: رد: قالوا زمان 19/9/2010, 20:13

قالو زمان

- معرفة الرجال كنوز.
- الفراق مبعوت بالحي او بالموت.
- يلى شفتيهم دورو علينا عرف حاجتهم فينا.
- اللي زرع الشوك تيحير فاحصادو.
- اطلع تاكل الباكور انزل شكون قالهالك.
- دوام الحال من المحال.
- حوتة وحدة كتخنز شواري.
- العمش فدار لعمى بعينيه.
- الحر بالغمزة و العبد بالدبزة.
- ما من بعد الشدة غير الفراج.
- دير النية و انعس مع الحية.
- يلا درتي بحالك بحالو باش فتيه.
- اللي تيتسحر مع الدراري كيصبح فاطر.
- حاول على حميرك تحج عليه.
- اللي فاتك خليه لبناتك.
- الله ينجيك من المشتاق يلا فاق.
- دوز على الواد الهرهوري و لا دوز على الواد الساكوتي.
- مول لتاج كيحتاج.
- اللي عضو الحنش كيخاف من الحبل.
- خدم يا التاعس على لناعس.
- اللي كيربي ولاد الناس بحال اللي كيدق الما فالمهراز.

..

موضوع: رد: قالوا زمان 19/9/2010, 20:20

قالوا زمان...

-لي شافتو غنو بغات منوا.
-الفار المقلق من سعد المش.
-الله يجيب لي فهمنا ومايعطيناش.
-رضينة بالهم والهم مارضة بينا.
-دجاج النص عقوبتو لماليه.
-لي شفتيه راكب على قصبة قوليه مبروك العود.
-الخوى حدها الدنيا.
-هم الدنيا يبقى فيها.
-و لي حفر شي حفرة يطيح فيها.
-خوك خوك لا يغرك صاحبك.
-العبد في التفكير و الرب في التدبير.
-الفياق بكري بذهب مشري.
-كون كان الخوخ كيداوي كون دوا راسو.
-عز الخيل مرابطها.
-ضربة بدمها ولا كلما بسمها.
-قنطار ديال دخان ولا
-وقية ديال البرد.
-الله يعتيها شي نقرا فاش يغبر نحاسها.
-لي عضو لحنش يخاف من الحبل.
-ليبغاها كلها يخاليها كلها.
-لي مارضا بخبزة مايرضا بنصها.
-ضرب لحديد محدو سخون.
-حماتي للاتي و مراتي مولاتي.
-فقيه الدوار مكتباسش يدو.
- مئة تخميمة و تخميمة ولا ضربة بالمقص.
-القرع بفلوسو ارى داك الراس نبوسو .
-اللي ما عندو فلوس كلامو مسوس .
-الصنعة يلا ما غنات كتستر واقلة كتزيد فلعمر.
-السفيه ما كينطق غي بلي فيه.
-ودن صمة و الاخرى فيها الماء.
- اللي ما شاف من عين الغربال اعمى.
-حتى طارو الطيور عاد جات الهامة كدور.
-اللي ما جاب لا قلام ولا دواية ما عول على قراية.
- حتى تطيح الشتى يا قرمان عاد يصبن حوايجو حمان.
-حسدو العمى على عكازو.
- عاند ولا تحسد.
- البكاء مور الميت اخسارة.
-اللي فات مات.
-مراة المنحوس ما هية مطللقة ما هية عروس.
-ملي تنحتاجك يا وجهي كيخبشوك لقطوط.
- جيت نبيع لحنة كترو الاحزان.
- حبوبت وجهي حكيتها سال دمها خليتها طال همها.
- الجوع و النوع و البكا بلا دموع.
- منحوس منحوس و لو على راسو فانوس
-كلشي درتولك جديد و السعد ما صبت فيه ما انزيد.
- رضينا بالهم والهم ما رضا بينا درناه عند
راسنا صبح عند رجلينا.
- الحنة حرشة و الحناية عمشة و العروسة فيها بو تفتاف.
-سوق النسا سوق مطيار يا الداخلو رد بالك
يوريوك من الربح قنطار ويديوليك راس مالك.
- ديرها فالرجال وترجاها و ديرها فالنسا و لا تنساها.
- لا يعجبها لعجب ولا الصيام فرجب.
- سيدي حادق و لالا احدق منو ، سيدي
- احسابو القديد و لالا كتقطع منو.
-كل غيبة كتزيد هيبة.
-عز الخيل مرابطها.
-جغمة من البحر و لا اجميل الكرابة.
- العز والنصر والسكنة فلقصر.
-الموت بالردم ولا معاشرت لخدم.
- حاسبني حساب عدوك و جلسني بلاصت خوك.
- دهن شواربك بالسمن و دوز على عدوك مصبن.
-اللي ماجي لعندك لا تمشي عنده.
-اللي اتخدمو طيعو و اللي اترهنو بيعو.
- كن نحلة ما تعدم اجبح.
-كن اسبع و كولني.
- يلا شفتيها بسعدها عرفها مكملا من عندها.
- ما تشري حتى تقلب و ما تصاحب حتى تجرب.
- امدح صاحبك قدام الناس و لوح صحبك الراس فالراس.
- حج و حاجة و قضيان حاجة.
- الكلب يلا انضام كيردها لنيابو و الحر كيردها لدراعو.
- يلا فاتك الكلام قول اسمعت ويلا فاتك الطعام قول اشبعت.
- اللي ما لقى الخير فركانو يكون الخير فلسانو.
-ما دير خير ما يطر باس.
- اج امي نوريك دار خوالي.
- لهلا يورينا فولادنا ميخلعنا.
- ادعاوي بارشاوي.
-عيطت على ديالي جاني عيطت على ديال الناس مشى و خلاني.
- ما يحكلك هي ظفرك و ما يبكيلك غي شفرك.
- مشات حليمة لمسيد ما صابتش احسن من اسعيد.
- اللي كثرو همومو كثرو اعجوبو.
-هده دار بونا والعبيد يخرجونا.
-يلا بغيتي اتوحش صاحبك سلفو.
- لكان الحمام يبيض لكان بيض قبابو.
- اللي درقك ابخيط درقو بحيط.
-اللي عندو باب وحدة الله يسدو عليه.
-اللي ما عندو سيدو عندو لا لاه .
- اللي فاتك بليلة فاتك بحيلة.
- تيدور الزرع حتى كيدور وكيرجع لعين الرحى.
- يلا امشا الزين كيبقاو حروفه ويلا امشا المال كيبقاو خروقه.
.-الزين كيحشم على زينو والخايب غالهداه الله
- الخير كيجلس والهم كيكمش.
- كيدق ويقول شكون.
- كيبيعو الارض ويضحكو على من شراها.
- حرتا ولا ورثا ولا سير حتى…
- بنت الدليل وبالثمن.
- بحال اللي كيزيد لهودي لجامع.
- الغربة كتلوح حتى لبلاد الشلوح.
- شط الحرير حتى تلحسو بيه لمقالي.
- ما يحس بالمزود غير اللي مخبوط بيه.
- اللي دارها بيديه يفكها بسنيه.
-قالو أش خاصك أ لعريان قالو خاصني الخاتم.
- نهيه نهيه ويلا اعمى سير وخليه.
- ما بين اللقمة و الفم تيريد ويحكم.
- لالا تيها وكلشي فيها.
- الضحك كيخصر البيع و الشرى.
- اللي حبك ما بنالك قصر واللي كرهك ما حفرلك قبر.
- اللي تيكون اناني تيبقى وحداني.
- اللي اربحتيه تاكله و الدين باش تخلصو ؟
-اللي ما جابتو المحبة ما تجيبو الحجارة.
- اللي ما عندو هم كيولدوهلو لخدم.
- اللحية مكترفد اللحية غير لقبر.
- اليد اللي طعمتنا الحلال تيكونو ناسها قلال.
- جيتي من البرية وابغيتي تاخد الولية.
- خليني نبلع ريقي حتى نعرف عدوي من صديقي.
- اطلع امساري واهبط شاري.
-طلع تاكول الكرموس ونزل شكون قالها ليك.
- ما احلى الحنطل يلا كان باطل.
- الشوف ما تيبرد الجوف.
- اللي ربط حمارو مع الحمير كيتعلم الشهيق و النهيق و الخروج على الطريق.
- اللسان طويل و الدرع قصير
-الفم ماضي و دراع كادي.
- اللي خرج من دارو كيتقل مقدارو.
اللي دار راسو فنخالة كينقبو الدجاج.
اش يقدك من الصلاة يا البايت بلا اعشى.
- الجمل ما كيشوفش حدبتو كيشوف غير حدبت خوه.
-ما ينفع غير الصحيح اما الراشي كايديه الريح.
- اللهم اعمش ولا اعمى.
- اللي شاف شي يقول الله يستر.
- لا مكحلة لا سكين غير الله لعوين.
-اللي فاتك بليلة فاتك بحيلة.
- مول البنات ما يبات هاني.
-ليزرب تعطل.
- لو كان الخير فيا ما يتزوج راجلي عليا.
- كان راجلي واصبحت انعشقو.
- يعيى من يعطي وما يعيى من يشد.
- اللي حبابو عريانين عمرو ما يتكسى.
- ملي كطيح البقرة تيقواو السكاكن.
- اللي احشم فما ضرو الشيطان غرو.
-عيبت المدبوحة على المشلوخة قامت مطيورت المخ كتحامي.
- لو كان الخوخ يداوي لو كان داوى راسو.
- الله يجيب اللي يفهمنا ولا يعطنشاي.
- وسواس من الجن ولا وسواس من ابنادم.
- حتى يخلاق عاد نسميوه عبد الرزاق.
- الله يعطينا شي نقرة فين يغبر نحاسنا.
-حتى قط مكيهرب من دار العرس.
- الصنعة يلا ما غنات كتستر واقيلة كتزيد فلعمر.
- اشعند الميت ما يدير قدام غسالو.
- شحال ما طال الليل كيصبح النهار.
- جلسة احسن من وكلة.
- نقا على نقا ما تيورد شقا.
- الزيادة من راس لحمق.
- كول بشهوتك و لبس بشهوت الناس.
- الدين مسود الخدين ولو كان من فلسين.
- قالو اشمتك قالو اعرفتك.
-السوم الاول عليه اتعول.
- اللي ما ولدو ما حن عليه.
- المثلة للسارية و المعنى للجاية.
- سد تصيب ما اتحل.
- اللي احفر شي حفرة كيطيح فيها.
-كون كان الخوخ يداوي وكون داوى راسو.
-لي شافتو غنو بغات منو.
-وريه وريه ولا عمى سير أو خليه.
-الفقوص من الصغر كيعواج.
- التربية في الصغر كالنقش على الحجر.
- العصى ما كتخلي من يعصى.
-ولد ولدك زوين ما تعدمشي اللي يبوسو.
- يا الطامع في الزيادة رد بالك من النقصان.
- الطمع طاعون.
-الطماعين تيباتو في الشماعين.
- ابنادم دربو على حلقو ينسى اللي خلقو.
- واش بغيتي الزبدة و فلوس اللبان.
- يلا كان خوك عسل ما تلعقوش كلو.
- نوضوها تشطح دارتها بصح.
- بنت بابا كبير نغاز الحمير.
-حتى حزقت عاد طمت رجليها.
- فرحت بلارج بولدو جا يبوسو تقبلو عينو.
- سيدي على سبة طلق لالا على حزقة.
- اتاي لعشية خير من بقرة مشوية.
- الي ما تفلق خرجاتلو برقوقة.
- البعرة كتقلب على ختها اربعين يوم وتقولها مرحبا بريحت الوالدين.
- شكون داها فيك يا الزميتة في نهار العيد.
-حسابتني كرمة وفيها الكرموص سعا هي خربة و فيها الناموس.
- الي سبق تياكل النبق.
- الي ما عندو هم كتولدولو حمارتو.
- يد في الطبق و عين على من زهق.
- بحال الي كيشطح لوجه لعمى.
-عكوزة وقبطت سارق.
- بحال الي تيسعى بولدو على كتفو هو تيقول انت على الله و ولده تيقول الله يجيب.
- دابزو يا الفيران على خميرة الجيران.
-كلشي كملاتو الدجاحة بقيلها غي لمشي فالليل.
- اللي ما اشطح ما غنى بحالو ابحال الطنة.
- خطب لبنتك و لا تخطب لولدك.
- ميات تخميمة وتخميمة ولاضربة بمقص.
- زواج ليلة تدبيره عام.
- الزواج و الموت هم لا يفوت.
- المراة الحرة ما تاكل غير من يد زوجها.
- الراجل بدراعو ماشي بمتاعو.
-اللي حبك حبو و لقلبك زوجو و اللي جفاك جفيه و تعداه و دوزو.
- يلا عشقك القمر و هلاله اشعليتك فالنجوم يلا مالو.
- زواج بنت العم اوسيدة للهم.
- تهجالت لعناية و لا زواج الدل.
-خود بنت قرابة و لا تاخد بنت غرابة.
- العاتق يلا بارت على سعدها دارت.

..

موضوع: رد 19/9/2010, 21:27

اللي تزوج بنت عمه بحال اللي عيد من غنمه

.....

ضربني وبكى سبقني وشكا

.....

ما يحك لك غير ظفرك وما يبكي لك غير شفرك

موضوع: رد: قالوا زمان 19/9/2010, 22:16

شكرا على هذه الأمثال الشعبية الجميلة ....
حتى نستفيد أكثر نضع مثلا أومثلين على أساس تفسير كل مثل وتجادب أطراف الحديث حوله ...
شكرا أخي منير شكرا أخي بنعيسى مع كل الود

موضوع: رد: قالوا زمان 19/9/2010, 22:28

أتلف الري لأهل الري
واصدق الري إلى التالفين
النعاج كيتغامزوا
والسبوعة خايفين

موضوع: رد 19/9/2010, 22:33

أمغرفة وحدة ﮜاع امسـﮜيانا
وما في الهم غير اللي يفهم

موضوع: رد 20/9/2010, 08:32

مُـول لمليـح بــاع وراح

واللـي ضَرْبـَتـُه يـدُه ما يبكـي

موضوع: رد 20/9/2010, 09:39

تفسير الأمثال الشعبية
ــ ــ ــ
ــ اللي تزوج بنت عمه بحال اللي عيد من غنمه
ــ ضربني وبكى سبقني وشكا
ــ ما يحك لك غير ظفرك وما يبكي لك غير شفرك
ــ ــ ــ
ــ اللي تزوج بنت عمه بحال اللي عيد من غنمه
يقـال هذا المثل انطلاقـا من قناعة الانسـان بالمعرفة التامة لأفـراد الوسـط
العائلي الذي يعيشه والتفاهـم الدائم والسائـد بشكل عفوي بين أفراد العائلة
حيث يسهل التعايش داخل فضاء يخيم فيه جو الانسجام ، تماما مثل الراعي
الذي يعرف شات قطيعه فتكون له قناعة اختيار كبش العيد نظرا لمعرفته
التامة بقطيع غنمه
ــ ــ ــ ــ ــ
ــ ضربني وبكى سبقني وشكا
وهذا المثل يصنف سلوك بعض الأفراد ، لأن هناك من يكون سباقا في الاساءة
لغيره ويتظاهر كأنه هو المظلوم ، وذلك نوع من الحيل للانفلات من اللوم
الاجتماعي أو من العقوبة القضائية
ــ ــ ــ ــ ــ
ــ ما يحك لك غير ظفرك وما يبكي لك غير شفرك
طبعا لابد للانسـان أن يعمل ويجتهـد ويسعى للحصول على قوتـه اليومي
بنفسه ولايضن أن في دون ذلك ينال المراد
وعملية الحك هنا صحيح مثلها
لأنه لايمكن لأحد أن يحك جلد غيره مثل ظفره
ولا يمكن لأحد أن يقوم مقام غيره فيما يرغب

موضوع: رد: قالوا زمان 24/9/2010, 22:31

إن لكل مثل حكاية :
كبرها تصغار

يحكى أن عبدا أراق قطرة مرق على ثياب ملك .فأمربقطع رأسه . فما كان من العبد إلا أن صب صحن المرق على الملك فازداد غيضا . فسأله : لماذا فعلت هذا ؟
قال العبد أخاف أن يعلم الناس سبب قطعك لرأسي " قطرة المرق " فيصفونك بالظالم ، لكن إن علموا أني قذفتك بصحن مرق ، فلن يعترض أحد على حكمك ويصفونك بالعادل .
بعد ذلك قرر الملك العفو عنه . فانتشر المثل : " كبرها تصغار "

..

موضوع: رد: قالوا زمان 24/9/2010, 23:28

إن البحت عن حكايات الأمثال شيء رائع.
فنحن نردد آلاف الأمثال ونستوعب دلالتها لكن غالبا ما نغفل حكايتها .
تجميع هذه الحكايات سيجعلنا ندون أجمل الحكايات ، الواقعية والخيالية.
شكرا الأستاذ موسى وأتحفنا بهذه الحكايات بحكم أنك حكواتي مطبوع وخريج جامع الفناء التي تعتز بها دائما

» اكذوبة السلام......
» عاشق من زمان آخر
» كَالو زمان
» كالو زمان
» بغداد أيام زمان