دك من معدن الكانة

موضوع: دك من معدن الكانة 2/8/2010, 22:31

مرتاح ف جوا كانتي
نفصل ظلي كيف تشهات فهامتي
نخيط كفني ف جلدي
و نجيه مخيط ما حدي حي
ننقص من كم عمري عوام
و نزيد ف سلهام كانتي ماية عام و عام

جيت للدنيا ف توب مطروز بكانة
و خرجت منها ف توب خارج عل الكانة
مشيت و جيت فيها
و لبست ماية توب و توب
توب يستر كانتي من لعيوب
و توب يهربني من كانتي هروب
و ف رجوعي لكانتي
يصدمني توب كانتي لمزوق بالذنوب

و إلا نخرج من كانتي
تدخلني حالتي
نحوز ضعفي نبنيه درجات
نطلع لسمايا
نحفر قبري برضايا
نحوز كانتي
و حفرتها حدايا

و الا نخرج من كانتي
يطفى ضو فهامتي
نشعل راسي فتيلة لظلام الكانة
نوصل لكانتي ف قوتها
نوصل لها ف نشوتها
نعانق قوة حالتي
نعكز بي و نوصل لي
نشعل الراس يطفى القلب
و إلا طفيت بلِّي فيَّ
نلقى ضوي من كانتي هرب

كانتي طالعة و انا نازل
مدردب فيَّ
كانتي نازلة و انا حاصل
نقلب عليَّ
نحفر بظفاري طريقي لها
تجيني ندخل ليَّ
نجيها تخرج مني
و أنا لي بكانتي معني
نلقى راسي خارج من كانتي
موسد رياح غرايبها
لي ما خرج من الكانة
ما خرج من اعقايبها

كانتي سما بنجوم
مرة شرقة مرة غيوم
ف شلة وجوه تجيني
نجيها بكية فالتة
تجيني ضحكة سالتة
تجيني حلفة حانتة
و أنا لي ف كانتي مغروم

الدنيا كانة
و الموت كانة
و بين كانة و كانة
طالع نازل أنا
نفصل حياتي بكانة
و يفصلني موتي بكانة
نعصر حياتي
نغربل لحظاتي
ندخل و نخرج من كانتي أنا
دخلة و خرجة ثقيلة و زربانة

نقول ها حياتي
ها تخمامها
ها باش تاتيني الكانة
تلوح بياضها بسمة
تعطي فتوحها حلمة
و تكتبني احجاب لكانتي
ترسمني فطانة لفهامتي

يا كانتي يا الساكنة فيَّ روح
يا كانتي يا روح الروح
نجيك ضو لظلامك و ظلامي
نجيك ظلام...
ندخل من شق احلامك ف منامي
نسرجك فيَّ حلمة
يا كمرة دايْرَة رجاها ف الظلمة
جيني شرقة ف صباحي لكحل
جيني مطرقة ياك صَدَّا المنجل
دخلي في روح
و نقي نقرتي من صدايا
دقيني فقدامك رشمة للطريق
و حصدي فيَّ تنواحي و بكايا