هههههههههههههههههههههههههههههههههههه

واحد ... اثين ..... ثلاثة
سارق يجري و بوليسيّة
سْرَقْ الضّحكه وْ راحْ بْعيدْ
منينْ نْجيبْ بربّي الضّحكة
لاهو عرْسْ وْ لاهو عيــدْ

ههههههههههههههههههههه

ضحكة ميتَه صفراويّه
فيلْمْ وَلآ تمثيليّه
فمّكْ يضحكْ
قلبكْ يكذبْ
زيدْ زيّنها بْربّي شويّه

ههههههههههههههههههههه

سارقْ يجري يجري يجري
الكلْ وْراهْ الكلْ جْرُوا
تعبوا تْهدُّوا تْعرّوا حْفُوا
خبزه مُرّه
مرّه ياسرْ
هُومَه جاعوا
جوعْهًمْ كافْرْ
ضحكه / خبزه / ضحكه طْريّه
فمّكْ يضحكْ
قلبكْ يبكي
صغاركْ جاعوا
وينْ تْولّي
منينْ تْجيبْ الضّحكه هْنيّه

ههههههههههههههههههههههه

اضحكْ يابني وزيدْ شْويّه
خلّيني نضحكْ مْعاكْ
همّ يضحّكْ / همْ ايبكّي
وحدي لا نبكي لا نشكي
نرسمْ ضحكه كْبيره برشه
قدّ الغابة ، قدّ الصّحرا
موجة زرقا
بْحرْها هايجْ
ولآ بْحرها طيّة بْطيّه
فيها سفايِنْ
فيها مْراكبْ
فيها عْرايِسْ متحنّية
فيها حوتْ كْبيرْ يْكفّي
فيها فرحة مُتْخُبّيْة
لا فيها سارقْ لا سرقه
لا عساكرْ تجري وْ بوليسيّه
هذي ضحكة ولآ حلمة
مْنامة سِكنتْ وسْطْ ضْلوعي
كلمة نبتت وسطْ ايديَّ

واحد ... ثنين... ثلاثة .... ميّه

ههههههههههههههههههههه

الثلاثاء 9/7/2008
العاشرة و الربع صباحا