حديث الرحى

موضوع: حديث الرحى 12/6/2010, 19:59

حديث الرحى

دوري... يارحى...
طحني زرع
ملحة
وحنّة
حْجرتك ولوْ قاصْحة
عامرة مْحنّة
ما همّكْ فقير و لّا غني
ظالم ولّا مظلومْ
كلْ شي عندك مْساوي
حْتّى تحْكمْ بالحقْ
المُوتْ
لوْ تْعرفي يا رْحى...
خبزكْ كْلاهْ...شْحالْ
من جاحدْ لاحدْ
وعابدْ فْ الخلْوة زاهدْ

دوري...يا رْحى...
اْنت و الزْمانْ خّوتْ
تْفكْري تْهرهيرْ لفجرْ
تْهونيتْ امّي او حنّة
كُلْشي دّاهْ الموتْ
واتْهنّى
فْ الترابْ راقدْ
لينا يتْسنّى

دوري ... يا رْحى ...
تْفكْري تعْويقة الفرّوجْ
فْ السرْويّة
امّي بْ ريحْ الجُوفْ
تْصوتْ
عْماها دخّانْ
لحْطبْ الفازكْ
فْ الكانونْ

دوري... يا رْحى...
شوفي المقْراجْ
مْعلّقْ فْ السْما
تحْتُه لْسانْ النّارْقادي
يطبخْ فْ الما
السْبُولة خارجة
بيضة صُوفْ
الفرّاحْ يشكي و يْنوحْ
لحطب دابْ اجْمرْ
الحرشة حيّة تْنادي
بْلسانْ لبّاخْ تهْدرْ

دوري... يا رحى ...
الدجاجْ فاقْ
يقْفزْ من لعْشوشْ
علْ اللّقطْ يْقلّبْ ملهوفْ
حْداكْ يْصيّدْ لحبوبْ
الزّاهقْ من الطحّانْ
كاسرْ ودنه
يْسْمعْ غْناكْ

دوري ... يارحى...
ساهلة
واقفة على قْطبْ
يْجرّكْ عودْ
ما تحتاجي فاخرْ
ولا مازوطْ
لا ريحة ولا دُخّانْ
ما تشْكي منّكْ غابة
ولا وادْ

دوري ... يا رْحى...
ْحكي ليّ علْ لجْدودْ
ايّامْ العايلة و لحفادْ
الخيمة كْبيرة واسعة
قدْ القلبْ
ايّامْ الصّابة و الجودْ
لا ميزانْ ولا صْروفْ
عْطيني نعْطيكْ بالنيّة
القلب فايض بالسماحة
الخير كان مْزيّة
فْ ايّامْ الشْتا و البردْ
مطمورة الميسورْ
تْفرّقْ لمدودْ
شْعيرْ و قمح و درة...
والعامْ طْويلْ علْ المسْكين
وقت ما بْغى
يْرُدْ الدّينْ
بْلا فايْذة ولا ربا
غيرْ اللّهْ يرْحمْ الوالْدينْ

دوري ... يا رْحى ...
الفتّاشة و القنديلْ
الضّو قْليلْ
يسْحرْالقلبْ
تسْرحْ لذّينْ
لكْلامْ يخرجْ سايلْ عْسلْ
بينْ الشْفايفْ
لرْواحْ طّيرْ
فْ سْما سابعة
مْعانقة
يقْصارْ اللّيلْ
يطْلعْ لفجرْ فْ غمْضة عينْ

موضوع: رد: حديث الرحى 13/6/2010, 09:31

حديث الرحى
حديث وازن
معاني
تزمم حالنا
على
صفحة ليام
ب
كلام حايل
على
طول الدوام

شكرا على الإمتاع أخي الميلودي العياشي
مودتي

موضوع: رد: حديث الرحى 13/12/2010, 23:06

أخي نجيب أمين

شكرا على المرور الجميل وعلى الرد الزجلي السكري .
الميلودي العياشي

موضوع: رد 14/12/2010, 14:03

المبدع الميلودي العياشي

تصور زجلي يمتح المتعة من دخيرة غابة لكلام
الفنية والانسانية دونها التاريخ بصفحات دفاتر الايام
دمت مبدعا ومحبا للابداع
تحيتي الخالصة

موضوع: رد: حديث الرحى 14/12/2010, 21:40

الأخ العياشي
كلما دارت رحى هذه القصيدة إلا وأخرجت من ثفالها الصور الجميلة
كان دقيق الرحى ألذ
وكان ميزان كلامك ومنبعه ينم عن علاقتك الحميمية بأرض الفلاح المغربي وهمومه.
ننتظر منك المزيد .

موضوع: حديث الرحى 23/4/2011, 21:58

للرحى كلام لا ينتهي أحاول أن أفهم منه القليل القليل . أحاول ترجمة اللواعج و
الحنين الى النقاء و الصفاء في زمن الميوعة و الرعونة بلغة اتمناها نافذة الى
العقول و القلوب .
الميلودي العياشي

» كأس حديث
» حديث الأعين
» حديث لعينيك
» حديث مع صديقي البحر ..
» حديث لمغدور...16ماي