حلم مع إيقاف التنفيذ - للشاعر محمد أبو زيد الأسيوطي

عدد المساهمات : 1 تاريخ التسجيل : 15/02/2010

حلم

مع إيقاف التنفيذ

و بحاول..

أدوَّر علي نفسي..

وسط المخاليق.

مش بلاقيني

وبدوّر تاني..

علي كياني

وفي أي..

طريق.

علي ضيّ نهار

يثبت ليَّ..

إن انا

عايش ..

بِحَقِيق،

أو كلمة حب ..

تِبِلِ الرِّيق.

طارت..

عصافير الأحلام..

من أغصاني،

ما عدتش تغني

ولا تزقزق،

ولا أي عبير..

عاد يتصدق

ولا أي نسيم

ولا نغم الحب..

ف ألحاني

بيقول:

تقاسيم..

وارجع تاني..

رغم التعتيم..

اللي ف شمسي..

اضحك..

علي نفسي،

وأتبسِّم،

وانده..

ع القمر المتخبى..

جوه الدهاليز .

بعد التركيز ..

بـ يرُدِ صداه..

حلمك..

مش قابل للتنفيذ.!

مش بستسلم

من بين ..

كراكيب يأسي

بلملم..

بعض الأفكار..

اللي اتخنقت

علي باب مقفول.

وغرام في الروح..

اللي أتحرقت

وأمل مقتول.

وبيتألم..

من عزم الريح،

وقصور أحلام..

بدأت تنهار..

في ضلام الليل

اللي معتم

وأنا لسه برتل

قرآني،

واقرا التسابيح

وبحاول تاني..

إني انا ارسم..

لوحة من الحلم..

اللي اتهدِّم..

تطلع شخابيط.

وألقي الوطاويط..

علي كل جدار..

غاوية التنطيط.

لو خطوتي..

حاولت تتقدم

يتقطع الخيط..

اللي ما بيني..

وبين الأحلام،

بعد المشوار

اللي ضانيني..

بلاقيني جريح،

مطعون بالسهم

اللي قتلني..

ميت مرة زمان،

وبحاول..

آخد أنفاسي..

يطلع دخان.

بيخلى..

النار المكمورة..

جوايا تشيط،

وزماني..

يعيد نفس الصورة،

والحزن شريط..

غاوي التكرار..

مليون مرة..

علي شاشة قلبي

اللي أتحرقت..

جوه وبره،

وأنا لسه شباب،

وكلاب..

مسعورة بتتسابق..

جوه السراديب..

علي مين هـ يفوز.

وأنا المنبوذ

مكسور وطريد..

من جنة..

أحلامي العالية..

لطريق العوز..

اللي ماشيني..

بالطول والعرض.

مين..

يشرب دمي

في شراييني..؟

ويصلي الفرض

علي روح..

أراجوز ..

مرمي علي الأرض،

ويحلي..

بلحمي المجزوز

ومعلق..

فوق الأبواب،

ويبارك ..

روحي المدشوشة..

في رحاية القهر،

وكرامتي ..

المنهوشة ف كوشة ،

وف عز الضهر

بدأت تتزف..

علي احلي عريس..

علي سيمفونية..

من الأحزان.

يرقص..

ويايا ويتراقص..

دمعي اللي اتهان..

من غير أحاسيس..

علي لحن عذاب،

مع صوت إبليس.

مين فيكم بس..

القرداتي..

اللي جايب لي

اللوز ..؟؟

علشان اتنطط

قدامه،

مانا لسه عبيط،

وكمان كدَّاب..

رغم التخبيط..

اللي كاسرني

والهم الِّلي..

في سجنه

أسرني..

أنا مش مهزوز،

لسَّاني بَعِيش..

مفرود البوز،

من غير كراميش.

وبنام واحلم ..

بمطر وسحاب..

رغم التهبيش.

بحلم..

والحلم لأمثالي،

ولا باب،

ولا شيش.

ولا حتى يجوز،

وعشان درويش..

أنا حلمي بسيط..

بحلم لو أكون..

إنسان فعلا..

من غير لا شروط،

ولا أي خنوع.

واغني..

نشيد الحرية

علي ورق التوت،

وبصوت مسموع..

بحلم بالفجر..

اللي بـ يدَّن،

والضلمه تفوت..

من غير..

لا رجوع،

ولا حتي سلام..

بحلم بسلام..

عدل وقوة..

مش استسلام،

وكمان مشروط.

بحلم بوليد..

يحمل اسمي

من بعد الموت

بحلم بالقوت..

اللي يكفّي

بحلم بوطن

ييجي ف صفي،

ويعيش مبسوط.

بحلم وبفوق..

علي نفس

الصوت.

كفياك تعجيز..

حلمك..

مش قابل

للتنفيذ.!

***

رابط للقصيدة بالفيديو علي اليوت يوب

https://www.youtube.com/watch?v=QAwkKC0PGok

» تعازينا الحارة للشاعر محمد كوبري
» صدور المجموعة الشعرية الأولى للشاعر محمد منير
» عتبات الذاكرة الاصدار الثاني للشاعر محمد عماري
» قراءةُُ عاشقة في "نبض الكلام" للشاعر و القاص و الرسّام محمد منير
» في حوار مع الشاعر الفلسطيني الكبير محمد حلمي الريشة وجائزة محمد حلمي الريشة للشعراء الجامعيين الشباب بالمغرب