ديوان لسان الجمر للزجال المقتدر الأستاذ احميدة بلبالي
[center]
الديوان من الحجم المتوسط ..114 صفحة...إحدى عشر نصا
1 - احليمة لبلاد آلولاد.
2 - لغشيم .
3 - لسان الجمر.
4 - الربطة.
5 - سر الدوام.
6 - غربل لحلام.
7 - الطيحة.
8 - الحمل المغدور.
9 - سيحت لعمر.
10 - باكورة النصر.
11 - الباطل.
اخترت لكم منه نص
الربطةعْشقْتَك يا الْعَالْيَه
يا زينة لرْيَامْ
وقْبَلْتْ شروط
ما قدِّيتْ عليها
عشقتك ف صورة امْرَاه
قلت نْجِيبْ من الرُّمَّان
الَمْشَعْشَعْ ف الجْنَان لَمْزَرّْب
نْوَّارُه
من ريش الطيرالْحُرّ
الَمْعَششّْ ف رَاسْ الجّبَلْ
الْوَانُه
من المرجان الْحَاثلْ
ف جُوفْ لَبْحُور
انْوَارُه
نصنع ليك مشموم
عليه قلبي خُصَّة فُوَّارَه
قُلْت انْسلّ من
لْسَان اللّهِيبْ
حْرِيقُه
ف خيط حرير
لْوِيزْ صافي نْزَلّـﭬـُـــُه
على ذاك الْجِيدْ
يرسم بين جبال الصدر
طْرِيقُه
قلت نَهْدِيك ضُوّ الْعِين
أنْتِ النَّعْمَه
وانا نَعْمَى
تبقى صورتك
وحدها قَدَّامِي
قدك قياس يْوَاتِي
وتكوني انت ﮔـُــوَّادِي
عشقتك يا العالية ﮔــمْرَه
من عيون الْعِينِين
عمَّرْتْ بحور
على وجْه الْمَا
نزلت النجوم
دايْرَة بالْــﮕــمْرَه تعُومْ
من خيوط لفجر
سدِّيتْ شَبْكَه
جْمَعْت فيها الـﮕـمره
و النجوم الْعَايْمَه
نَهْدِيها ليك بْتَاتْ
يا زِينَةْ لَبْنَات
عشقتك يا العاليه دنيا
وبْقَتْ شْرُوطَك مْحَيّْرَانِي
ايِلاَ كنْتِ شْدَّه
وكان لاَ بُدَّ
عَصْرِينِي شَهْدَه
عسل نقْطَرْ ليك
ايِلاَ كنتِ شَكْوَه
–الشّكْوَىلله-
عزليني من اللّبْن زَبْدَه
نرْطَابْ أبَعْدَا
و نْوَاتِيك
ايِلاَ كنت نَسْمَه
جِهةْ القلب هَبِّي
دمُّه مَسْك وعَنْبَر هوَّ
طِيبُه يفُوحْ عْلِيك
ايِلاَ كنتِ مُوجَه
جهة الشط صُبِّي
صدري حجر ورمله هوَّ
مَطْرَحْ يدَفِّيكْ
آشْنُه ذَنْبِي
ايِلاَ القلب بْغَاك
طَاوَعْتك يَاكْ
وما زال شْرُوطَك
مكْبّلاَنِي
كِيفْ نَبْنِي ليك
خِيمَة ف السْمَا
ورْكايِزْها بَهْمَه
ونْجِيبْ لَغْمَام
انْجَلّلْ بِه
آشْ من غابه
نَمْشي نَحْطب
ونجيب السّبَعْ
كَنَزْهَرْ علِيه
إنسان انا
وانتِ عاليه
وعالْمَة وتْشُوفي
شاهْدَة ملِّي
كان الْحُب شْهَاده
جِيتْك نتْهَادَى
والخوف ساكن جُوفِي…
عَهْدك الْعَشْرَان
عليه شَاهْدِين
مدْﮔـــوﮒْ ف القلب وُشَام
عَرْبُون الدْوَام
ما تمسحُه رياح
ماتْبَهْتُه ايام
حالف يالعاليه
بحْلُوفِي
حبك مايَهْدَا
ما تكُون ضَرّتَكْ
غير لْمِّيمَه
ولْعشِيرَه
وحْرُوفِي
[/size]