مقدمة ديوان : عرام من لكلام ...و فين السامع ؟
وُ رانِي الحَقْ نقولْ لِكْ :
ركَبْت عاوُدْ فهامْتي ...سَرَّجْتُه حروفْ ،وُ لمْعانِي زْريبَة وُ رْباطْ الخَيْلْ .قلتْ مَنْ حَطة لْحَطة نَتْكايَسْ على عاوُدِي إلى بغيتْ نَرْكَبْ عليهْ .
وُ رانِي الحَقْ نقولْ لِكْ :
ما طامَعْ فْ عَرْفَة وَ لا فْ تبُوريدَة ،بغيتْ حَرْفِي يْساعَفنِي ...يْهَرَّبْني بْعيدْ على راسي وُ راسْ الدَّرْبْ ،يْرَزَّمْنِي فْ ظهْرُه وُ يْقَطعْنِي وَادْ هْبَالِي ،بْغِيتْ حَرْفِي مَا يُخْرَجْ حَارَﮔ خَيمْتُه وُ نْوالة حْصَادُه ...يْسَفّْ رْمَلْ لبْحَرْ وُ يْرُدُه لِيَّ وَرْقَة بَيْضَة ...يَشْرَبْ مَاء لَبْحَرْ مْدادْ... بِهْ نكْتَبْ وُ نَرْسَمْ ضَحْكَة لمْعاني عْلِيَّ . فْ شَطْ لبْحَرْ يَجْمَعْ اللوَاحْ الحَارْﮔة ...يَحْرَكْهَا وُ بَرْمَادْها يْسَوَّكْ وُ يِكَحَّلْ عَيْنْ بْلادُه .
وُ رانِي الحَقْ نقولْ لِكْ :
ما بْغيتْ حَرْفي يبقَى تَرَّاسْ على خُوتُه ...يَهَزّْ لقلُمْ مَدْرَة وُ مَنْجَلْ وُ اِلا طاحَتْ الشْتَا مْدَادْ ،يْدَرِّي وُ يَحْصَدْ كلمَة وْرا كلمَة .
وُ رانِي الحَقْ نقولْ لِكْ :
بْغيتْ حَرْفي يْشَاوَرْنِي الا بْغَى يَخْرُجْ ...ما يَهْرُبْ مَنْ لسانِي ما يْطُجْ .يَنْعَلْ الشِّيطانْ فِيَّ ...يَتْوَضَّى بْ ريقْ لهَاتِي .ما بْغيتُه يْكُونْ سِيفْ ...يَتَّغْرَسْ فْ وُذَنْ السَّامَعْ .ما بْغِيتُه يكونْ حَيْطْ ساسُه مَبْنِي عَ الرّْمَلْ .
وُ رانِي الحَقْ نقولْ لِكْ :
بْغيتْ حَرْفي تْكونْ نَفْسُه فْ نيفُه ...اِلا دْخَلْ لْعَتْبَة المَخْزَنْ ،بْغَيتُه يَبْقَى راجَلْ ...شَادْ فْ كَلمْتُه ،عَاضّْ فْ الصّبَرْ وُ فْ الوَرْقَة .
يَمْكَنْ وْذَنْ مَنْ شِي وَذْنِينْ حَسْبَاتكْ يا حَرْفِي فاهَمْ ...يْغَرْبْلوا نُخَّالتَكْ وُ يِعَجْنُوكْ ،فْ كَصْعَة مَنْ لحْدِيدْ وُ كِيفْ بْغَاتْ الوَقتْ ، يَمْكَنْ تَلْقَى رَاسَكْ وُلِّيتِي حُرَيَّفْ مَحْكُورْ .
وُ رانِي الحَقْ نقولْ لِكْ :
إلا سَاعَفْنِي حَرْفِي ،رَانِي نْبَاتْ وَسَطْ كْسِيبَة كلامِي ...نْدَزْ صُوفَة حْرُوفِي مْعَانِي بِها نَدْفَا ،وُ يَدْفَا قَلبِي ،وُ راسي إلا تْعَرَّا مَنْ شَعْرُه ،قالوا :حْرُوفُه ،وُ الرَّاسْ إلا غَطاهْ الزَّفْتْ قالوا:حْرُوفُه ...وُ اللسانْ لِّي وَاحَلْ فْ رُوحِي ،حامَلْ يَتْوَجَّعْ ...كَرْشُه عامْرَة مْعَاني ،يَمْكَنْ فيها الرَّاقَدْ ...وَاشْ يِخَرَّجْ الرَّاقَدْ غِيرْ لُغْرازْ ...
وُ رانِي الحَقْ نقولْ لِكْ :
ما بغيتْ حروفْ عَاقْرَة ...بْغيتْ الحَرَفْ إلا عانَقْ وُ حازْ حَرْفُه ،يُوَلْدُوا مْعاني... نْكَمَّطْ وُ نْخَرَّقْ وُ نْراري .بْغيتْ حََرَفْ كارَحْ ... ما يُخْرَجْ مَنْ كَرَشْ لساني مْلاوَحْ، إلا تْحَطْ عَ الجْمَرْ يَطْفيهْ رْمادْ ،وُ إلا تْحَطْ عَ الرْمادْ يِشَعْْلُه جْمَرْ .
وُ رانِي الحَقْ نقولْ لِكْ :
بْغيتْ حَرْفي يشَعَّلْ لعْوافي فْ لَمْطافِي ...إلا تْحَطْ عَ البيرْ يرُدُّه كانونْ،يرَيَّبْ حيوطْ الظلمَة وُ يَخَرَّجْ كُلْ مَسْجُونْ ،وُ إلا كتابْ وُ قْرَاوَهْ ناسْ الدُوَّارْ ...الكْباَرْ مَنْهُمْ وُ الصْغارْ، يِحَطُّوا تاجْ على راسُه وُ يرُدُّوه قانونْ .
الرئيسية 
