ماشي كل حنك يتباس....

موضوع: ماشي كل حنك يتباس.... 24/11/2009, 11:29

" ماشي كـل حنـك يتبـاس "

يا خوي
ما شي كل حنك يتباس
وماشي دير عمامة فوق الراس
فيوم تكول أنا سيد الناس
راه كل زمان عندو رجالو…

حل عينيك مزيان وشوف لبلاد
للي حمم نيفو يكول أنا حداد
وللي لبس كسوة يكول أنا من لجواد
ولمزوق من برا آش خبار ادخالو

شي ناس دارو السياسة طريق ومسلك
يجريو يضاربو على لكراسة كلشي باغي يبرك
كلشي ينادي بالتغيير والتغيير تهلك
آش هاد الزمان كلا يغني موالو

واقعنا حاجة وكلامكم راه ما منوش
خطابات مزوقة وشعارات مكتوبة كيف البخوش
سمسارة وشناقة وشي وحدين ما فاقوش
فين حنا والمعقول تخوصص بكمالو

آجيوا نحسبوها حساب الريال والكرش
واش كبير الكرش يبغيها تفش
واش العود البركي فالتبوريدة كيف الدحش
واش للي فكرشوا لعجينة يتغير حالو

اخوي راه الطالع ما باغي ينزل
مول لعقل ماخدامش مول الشكارة مفضل
إلى بفلوسو شراك غد عليه لا تعول
والفلس حاكم، يقطع اللسانات إلا طوالو

بغيت نفهم واش السياسة كرسي فجماعة وبرلمان
واش السياسة حصانة وصندوق البريد بلا عنوان
واش السياسة امتيازات لهذا فلان ولذاك فلان
والشعب يكدد عظم التغير معضوض اللسان

واش السياسة كلام وسلام صفقة
واش السياسة كلب دمو ما فيه شفقة
واش السياسة غالب ومغلوب نهب وسرقة

هادي بلادكم
وهادوا ولادكم دايعين بالزنقة...

موضوع: رد: ماشي كل حنك يتباس.... 24/11/2009, 20:28

لحال
فينا حال
إمتى صحواتو

شكرا السي محمد مومر على هذه الصيحة المباشرة الصادقة...تحيتي

موضوع: رد 25/11/2009, 00:09

محمد مومر كتب:: راه كل زمان عندو رجالو…
حل عينيك مزيان وشوف لبلاد
للي حمم نيفو يكول أنا حداد
وللي لبس كسوة يكول أنا من لجواد
ولمزوق من برا آش خبار ادخالو

بغزل الحروف تولد الكلمة
وبنسيج الكلمة ترسم المعنى
ولكل معنى حكمة
دام لقلمك التمكن من رسم الحكم الفنية

موضوع: رد: ماشي كل حنك يتباس.... 25/11/2009, 09:50

صباح الخير

شكرا جزيلا على مداخلاتكم الصادقة

عيد مبارك سعيد
مودتي