عْلى جْلايلْ ليّامْ

موضوع: عْلى جْلايلْ ليّامْ 23/11/2009, 21:20

عْلى جْلايل ليَّام
ملْهي …
نْرقّع طْروفْ شايْطة
عافَس فْ طريق مْحفّر
نَحسب ستَّة من ستِّين
فينْ غادي أنا ...
فين ؟
دْوايَ ف تَخْمِيمَة
تدْوي بالمَعنى
فيَّ تْفيق و تكْبر
ودّير لْسان
بها نْصبَّن شِين الحَال
السّاكن فْ شْعابْ لمْجاج

اشْتفْ عَيتَفْ...
نقّي حالي نرتاحْ

حايك لعمر
المرقّع
يقطر وْسخْ
شحال لْقى من عْجاج
بحمرية ملطّخ
كُلْ من زْرَد و شْبع
فيه يمسح صْباعُه
ويتگرع
لله يا العطّار...
ها عبْرة
من صابْة لفْهامة
صرّف لحروف
بْصابُون تازة
الاَ كْفى

شْتف عيْتف...
نحْرث عقلي
نفلحْ

أنا گدرة فايْرة
نارْها شاعْلة تگدي
الفرْناطشي حادگ
غِير يفلّگ فْ لحْطب
ويْدنِّي

شْتف عيْتف...
نصرّف وقتي
حروف ضاوية

نخلّط لكْلام
و نشربُو على الرِّيق
هو دْوَا للعلّة ...
و صْديقْ
شْعلتْ وهاجْ لْهيبي
عضِّيتْ فْ جْنابي
قلّبتْ عْلى سمْ
نكتب بيه غْدايدي
لقيتني غدايد سمْ
يقطرفْ عظامي

شتف عيتف...
علاش نقلّب...
وتالفْ ؟

المعقول ...!؟
كُمشةْ من بْنادم
مْقرْقاهْ
عافُت ريحة لعْفن
وعْطات التِّساعْ
تتسنّاهْ
ايمْتى يفقّس...؟
ما عكْعك …
ما طار بجْناحْ
الناس مربوگة ...
اشْياهْ
ْفْ زْريبَة تتْزاحَمْ
عسَّاسِين عْليها دْيابْ
يفَرسُو لّي
تخطّات الزَّرْب.

تيفلت في فبراير2009
ومارس 2009

موضوع: رد: عْلى جْلايلْ ليّامْ 24/11/2009, 10:57

اخي الميلودي العياشي

تحية تقدير واحترام

زجلية جميلة ومعبرة...فيها يتكلم الحرف بصدق واحساس

مودتي

محمد مومر

موضوع: رد: عْلى جْلايلْ ليّامْ 24/11/2009, 20:07

بوح عميق بتفاعل الذات مع الواقع المر استشرافا للتغيير ...
شكرا لحرفك المتألق في سماء القريض الشعبي ....
تحيتي أخي الميلودي العياشي

موضوع: رد 24/11/2009, 23:53

لا بد للحرف أن يرسم بكل صدق التصور الفني
الذي تجود به قريحة الكاتب في تشكيل القصيدة الزجلية
بكلمات تختزل من غلة خريف الموروث الشعبي الأصيل
وتلك غاية المتلقي في المتعة الفنية بحضور الصور الشعرية
المغرية لاحساسه بكل عشق في التفاعل مع مضمون النص
دمـــت مبدعــــا
مودتــــي

موضوع: على جْلايل ليّام 23/12/2009, 21:11

الشاعر محمد مومر
كلماتك الجميلة قلادة على كتفي .اتمنى ان تتاح لي الفرصة للتواصل اكثر . دمت مبدعا .
الميلودي العياشي