يا ليل

يَا لِيـــــــــلْ ..

فَرَّزْتْنِي جْنَازَةْ بِينْ يَدِّيكْ

غَسَّّلْتِينِي بِالْهَمّْ

فْرَكْتِينِي بِقَطْرَانْ

حَكِّيتْنِي ب ْ حَجْرَةْ..

يَا لِيلْ..بِمْوالِيهْ

شْكُونْ غْوَى السُّهْدْ

يَشْرَبْ كَاسُو

عْلَى نِينْ كْلاَمِي

شْكُونْ دَسَّرْ القَمْرَة

تْجِي ضَاحْكَة لِيلَةْ شْطَانِي

شْكُونْ خَوَّفْ ضَوْ النْهَارْ

يْرَارِي ب ْ الظَّلْ عَنْدْ قْدَامِي

يَا لِيلْ ..بِأَوْلُو وْتَالِيهْ

هَكَّا تَعْقَدْ ثْلاَتْ سَبْحَاتْ

كُلْ سَبْحَة عُشْرِيَة

تْسَرْسْبَتْ مِنْ جْلاَلِي

عْقِيقْ مَفْتُولْ بْنْظَامِي

عْفُو الله مَنْ ضِيمْ مْكَثَّمْ

السَّاكْنَة فِيهْ ذَاتِي

المَنْصُوبَة عْلِيهْ خْيَامِي

المَشْدُودَة فِيهْ وْثَاقي

المَرْفُوعَة عْلَى تَلّْ حْطَامِي

يَا لِيلْ..يَا كُلّْ لِيلَة مِنْ لْيَالِيهْ

ذاعْ فِيهَا سَرِّي .. وْسْرَى

خَاطْرِي هَايَمْ قُدَّامِي

بِمْنَازَلْ مَهْجُورَة فْ ذَاتِي

يَرْكَنْ جَرْحِي هَازّْ الدَّقََة

مْتَكِّي عْلَى ْ وَرْقََة

يَتْصَنَّتْ لْعْظَامِي

يْعَبِّي الدَّمْعَة فْ قْلاَمِي

يْقّطَّرْهَا سْخُونَة

تْبَلَّلْ كْتُوبِي وْ كْمَامِي

يَا لِيلْ ..وْيَا المْغَزِّي فِيهْ وْ بَاكِيهْ

كُونْ حْسَبْتْ القْلَمْ مَا يْزِيدْ غِيرْ لُومْ

مَا كُنْتْ حَطِّيتْ مْدَادُو فْ ابْهَامِي

مَا بْصَمْتْ عْلَى بُوْحِي وْكْلاَمِي

مَا رْهَنِّي القْصِيدْ صَيْدْ

مَا شْرَطْ عْلِيَّا نَسْهَرْ

وْالمُرّ فْ جُوفِي حَامِي

يَا لِيلْ ..وْبَعْدْ لِيلْ مْتَلِّيهْ

تَتْخَبَّا بِينْ رْفُوفْ سْقَامِي

تَتْمَسْكَنْ فْ طَيْفْ حْنِينْ

تْوَلِّي أْنْتَ وْ القَمْرَة خِلاَّنِي

تْوَشْوَشْ فْ وْذَانِي ..

خَايْفْ عْلِيكْ آوْلِيدِي مَنْ النّْهَارْ

خَايْفْ عْلِيكْ تَلْقَى رَاسَكْ بَرَّانِي

يَا لِيلْ .. وْرَبِّي العَالِمْ بِيهْ

عُمْرَكْ مَا كُنْتْ عْلِيَّا حَانِي

غِيرْ سِيرْ وْسَيَّرْ جَنُودَكْ

طْفِي شَمْعْتِي ف ْ بْكَاهَا

طْفِي هْمُومِي فْ تَخْمَامِي

رْخِيتْ حْزَامِي

رْخَاتْنِي الرَقْـدَة

رْخِيتْ قْلاَمِي

تْقَمَطْتْ ف ْ الوَرْقَة

تْغَمْغَمْتْ ف ْ احْلاَمِي

حَلِّيتْ صَدْرِي

طْْلََْقْْتْ سْرَاحْ احْمَامِي