القهوة...

موضوع: القهوة... 10/11/2009, 16:52

" القهــوة "

فالقهوة
مع غروب الشمس
الليل يحلل ليلو بظلام
ويطيح الظلام
نشوف لكراسة.. فالحس...

تسوس غبارها
دخانها
وحديث الناس
من فوقو يطيح... الحرف
اخرس...

كلام البارح
كلام اليوم
كلام مل الكلام
وريح...
على عتبة القهوة عطس...

كل واحد راح فحالو
سرج خيالو
البال يعثر
والطريق عثرات
ولعقول رواغل وراغول
والنفس تباعت وتشرات
بالفلس...

خوات القهوة
والكرسي شد مكانو
وحيد
يخمم فغد
والبارك عليه
فضفض وراح
ينعس...

طفا ضو القهوة
نعس الكرسي
وركدوا لكراسة
كرسي حدا كرسي حدا كرسي
لا خطوة ولا همس...
الكرسي حلم فمنامو
مللي طلع الصباح
وفاقت القهوة
وفاقوا الكراسة
وتحلت لبواب
والكيسان تفطر بلحليب
والماكينا سخنت عروقها
والقهوة حلت دماغها بكاس ديال القهوة
وبدات الحركة
براد ديال اتاي
نص نص
قهوة كحلة
ليمون
عصير تفاح
مسمن حرشة
بتيبان وفوري
والصينية غادة جاية .. ترقص...
والبارك على الكرسي إنسان
عاقل واعي .. متميز
حديث ميزان
كلام موزون
لحروف معنى ودرس...

الكرسي فرح
وكال الناس تغيرات
بروكها فالقهاوي.. نقص...

الكرسي نشط
بللي بنادم ما بقاش عندوا الوقت
فين يشرب كاس القهوة
ولا نص نص
الكرسي تعجب
حنحن وزغرد وشهق
بالفرحة
وفرحات للي كان بارك عليه
اصبح خدام
مشغول
يبني بلادو وحق ولادو
ويجني الغرس...
الكرسي تنهد
وكال: غادي نتوحش شكون يبرك علي
بالساعات والنص...

تحلوا قفال القهوة/ بالزيط والريط
وفاقت لكراسة
وفاق الكرسي
بالفكرة مخلوع
كال كنت كنحلم
وارجع البارك علي يبرك بلا ما يحس...

وارجع لكلام الخاوي فوكو يدفك
حروف وحروف
والبارك ما عندو نفس...
يحسب الداخل والخارج
وللي زلك على النص...
ولي فكاسو يلحس..

والكوروندير يجري على الدخان
والدخان يعنك ثوب الناس
والناس فادخالها تلهب
والكلب تنكس...

موضوع: رد: القهوة... 10/11/2009, 19:31

لكراسى تتألم
عاد ليها لسان تتكلم
عيات ملات
بنادم ف لقهاوي عاصر
الدخان ...التحنزيز
وكلامو خاسر
لكراسى من همو شكات
تسرسبو دموعها حجر وبكات

كشف عن واقع المقاهي / السجون الإختيارية ...بين القهوه والقهوه قهوه....تحياتي أخي محمد مومر

» طقوس اعداد القهوة كل صباح شتوي