لهاث وغواث

ما اصْعَبْها نَكْبَة عْ الحُرّْ
يْضَيَّعْ الحَرْف ْ
يَنْحُو بْلاَ قَافْ
بْلاَ صَرْفْ
يْطِيحْ منْ عْلَا صَهْوَةْ الكَلْمَة مَصْرُوعْ
ما صْعَبْها مَحْنَة عْ الفَارْس
يَتْعَكَّلْ خِيلُو
يَتْهَرَّسْ خْيَالُو
بينْ حْوافَرْ الضّعْفْ و الخْنُوعْ
آاحْ آاخَيْتي آاخ ْ
أنا سَرّجْتْ مَعْنَاتي
حْكمْتْ رْبَاطْهَا
قُلْتْ نْسَايَسْها بخْيَالي
فْ السَّاعْ تْطُوعْ
فْ خَطّْ السَّرْبْ تْسَرَّبْتْ خُطْوَة
رْكُوبْتِي حُرّة نُوَّة
لْجَامْهَا حْرِيرْ
رْكُوبْتي غُنْوَة
غَنِّيتْهَا بْلسَانْ
الطّيْرْ
رْكُوبْتِي كَلْمَة
وخَرْجَتْ مَنْ لْسَانِي
لَكَانْ يَذْبَحْني لْسَانِي.. يَا رَبِّي
عْلاَشْ ذَبْحَتْنِي الكَلْمة
لَكَانْ عْزَاَيا كَانْ
مَا خَرْجَتْ الْكَلْمَة مَنْ الطُّوعْ

حْمَاتْ الشّارْدَة
غَابَتْ الوَارْدَة
عْطَاتْهَا الْعَزْبَاتْ لْلْتَبْرَاحْ
وْهَنْ خَيْلِي .. طَاحْ
طَحْتْ فْ الظِّيمْ
آاحْ آأخَيْتِي آاخْ
تْكبّدْ الگِيْحْ فْ جْرُوحِي
دَّمْ خَاتَرْ مَا نْزَلْ
مَا بَرَّدْ قْرُوحِي
العَيْنْ يَبْسَتْ
تْكَوَّّرْ مَاهَا
حَلْفَتْ الدَّمْعَة مَا تْجُودْ بِعْزَاهَا
سْقَامْ ..سْهَرْ
..نْدَامَة.. القلب مَوْجُوعْ
حَتّى مْوَاجْعِي مَنّي
تْوَجْعَتْ
رَطَّبْتها بالثلج
بَيّْتْهَا تَحْتْ النْدَى
ثَفْلَتَ عْلِيهَا الْنْجُومْ
كْوِيتْهَا بْضَيّْ الگمرة
وْ مَا بْرَاتْ
مَاااالِي .....
مَالِي نْشَّمْ ..
رِيحَةْ هَمِّي فْ الدْجَى فَوَّاحَة
نْشَّمْ رِيحَةْ الْحْرَاگ فْ دَمِّي گدَّاحَة
الْعْرُوقْ مَنِّي بَاغْيَة تَهْرَبْ
تَثْقَبْ جَلْدِي وْ تَنْدَبْ
تْقُجْ عُنْقِي وْ تَتْفَكْ غِيرْ مَنِّي
مَاااااالي...
مَالِي تْسَنِّيت
لْيَامْ تْجّبَّرْ هَنِّي
وْخَاطْرِِي يْتْلَّمْ بْلَا جْبِيرَة
مَاااااالِي
تْسَنِّيتْ النَّحْسْ يَرْكَلْنِي وْ مَا طْلَقْتُوشْ
مَالِي تْسَنِّيتْ الَرَّهْجْ يْعِيفْنِي وْما
عَفْتُوشْ
آاحْ آاخَيْتِي آاخْ
الضَّنْكْ عَظّْ مَنْ رْبِيعِي دُغْمَة دُغْمَة
شَيَّبْنِي
الهَمّْ مَنْ رِيقِي شْرَبْ جُغْمَة جُغْمَة
شَحَّفْنِي
الْحَسْرَة ..التخمامْ ..الّلوعْ
منْ قَالِّي
نْبَدّلْ سَرْجِي بْمَحْرَاثْ
مَنْ قَالِّي وما سْمَعْتْ
رُومْ لْ الزِيتُونَة وأرگان
غْرَسْ حْبَقْ , غْرسْ لُوزْ
خَلِّي لْحْلاَم ْ سَمْرَا ..
لو عْرَفْتْ ...آه
تِيغْرَمْتْ مَا مَنَّكْ زُوجْ
لُوْ رَْشگْتْ فِيكْ لَوْتَادْ
وْحَطِّيتْ رْحَالِي جَنْبْ النَّخْلَة
لُوْ حَطِّيتْ عْنَايْتِي ف ْ قَلْبِي
مَا كَانْ قٌصِِيدِي فْ الضَّبْرَة
صُغْرَة فْ حُْﮔرَة..
وأرْضْ حَارَّة
مَا تْطَلَّعْ غِيرْ الكِيفْ
وْكِيفْ ... كِيفْ
كِيفْ يْخُونِّي عَقَلِي
وانَا لِي رْزِينْ مَا نَهْتَرْ
كِيفْ نَحْصَدْ الشِّيحْ وْ حَمْرَةْ الشُّوكْ
كِيفْ نَحْطَبْ ذَلِّي وَسْط ْ الجْمُوعْ
لاَ تْبُورِيدَة ..لاَ غَلَّة..
لَا حَبَّةْ نْبَقْ
لاَ ظَلّْ شَجْرَة
لاَ قْمَرْ مْضَوِّي لاَ بْحَرْ مْهَوِّّي
كِيفْ نْبَانْ شَاطَرْ و خِيبْتِي مَرْسُومَة
مَاضِي تَاعَسْ و سْنِينْ تَحْتْ سْنِينْ مَرْدُومَة
كِيفْ نْتْدَلَّى وْرَا سْجِيْتِي تَحْتْ التْرَابْ
بَعْدْمَا كَانَتْ هَمْتِي شَانْ مَرْفُوعْ
آاحْ آاخَيْتِي آ اخْ

سْهِيتْ بِينْ لْفْيَاقْ و النّْعَاسْ
شَفْتْنِي نَعْقَدْ فْ النْجُومْ و نَعْمَلْهَا تَسْبِيحْ
نْلَّحَفْ لْغْمَامْ بْثُوبْ ازْرَقْ
وْنحُطُّو تَسْرِيحْ
شَفْتْنِي مْتَكِّي
مْتْوَسَّدْ سْحَابَة عْلَى يْمِينِي
وْعْلَى شْمَالِي غَيْمَة تْغَنِّيلِي
ورِيشْ نْعَامْ يَتْطَايَرْ ..كِيفْ لْحْمَامْ
والقَمْرَة مْضَوْيَة
.. تَشْطَحْ بْ خْيَالِي ..
تْفَضْفَضْ لِيَّا بْ اسْرَارْهَا
كِيفْ غَسْلَتْ ذَاتْهَا
مَنْ فُوقْهَا .. مَنْ تَحْتْهَا
كِيفْ تْفَسْخَتْ لْلْوَادْ وْ كْسَاتُو لُونْهَا
كِيفْ تْعَطْرْت
..كِيفْ بَاسَتْ لْحْلاِمْ
وخَلاَّتْ السْهِيدْ بَعْدْ الفَرْحَة مَفْجُوعْ
سْهِيتْ
وْفَََقْدِي نْبُوحْ بالذَاتْ المَحْزُونَة
القَمْرَة بالذَّاتْ اللِّيلَة مَشْطُونَة
عْرُوسْ تْعُوسْ والغُرْبَة غْبُونَة
وانَا هَرْبَانْ مَنْ غُرْبَةْ دْيَارِي
جْلاَتْنِي الغُرْبَة عْلَى غُرْبَتِي
وانَا نْقَلَّبْ عْلَى لْعْزَا
ضَيَّعْتْ عْزَايَا وْضَيَّعْتْ وْصِيْتِي
ضَيّْعَتْنِي ْلحْرُوفْ ..ضَيّْعَتْنِي حَرْفَتِي
سِكِّينْ النْدَامَة جَرَّحْ فَرْحْتِي
حْزَانِي زَادَتْ
احْزَانِي اللِّي مَا تَشْبَهْ قََطْرَانْ بْلادِي
حْزَانِي سَاقْيَة مَجْرِيَة
حْزَانِي لْهَبْ
حْزَانِي لْظَى وجْمَارْ مَدْفُونَة فْ الضّْلَوعْ
حْزَانِي فَاسْ نَازَلْ ضَرْبْ فِيَّا
حْزَانِي غَدَّا يَا هَامَلْ حْزَانِي
حْزَانِي مْبَارَحْ ذرَاهْ الرِّيحْ
حْزَانِي غُرْبَة و ْ مْوَاوَلْ
مَا يْعَزِّينِي قْصِيدْ وَلاَ بْرَاوَلْ
عَيّطْت ْ بْ مْيَاتْ تَبْرِيحَة
رْسَمْتْ ب ْدَمِّي ذَاتِي الجْرِيحَة
غَزّيتْ فْ القْرِيحَة
غَوَّثْتْ ولاَ مَنْ جَابْ سَرِّي
لاَ عْزَا دْفِينْ
..لا مَنْ ضَّمْ صَدْرِي
غْوَاثِي ضَاعْ فْ الخْلاَ مَا جَابْتُو رْبُوعْ

آاحْ آاخَيْتِي آاخْ
تْرَايْنِي نَتْنَخْصَصْ زَيْرَتْنِي الوَحْشَة
هَنِّيتْ مَصْهُودْ
وضَرْبَتْنِي جَايْحَة
تْرَايْنِي نَتْخَبَّى مَنْ قْرَانِي
ونْقولْ عِيتْ
تْرَايْنِي ﮔددت اقْلاَمِي
وجَفَّفْتْ دْوَايْتِي
وكْنَسْتْ قْصَايْدِي بِيتْ بِيتْ
تْرَايْنِي كَسَّرْتْ سِّنْ السِّينْ
ودَوَّزْتْ عْلَى لْسَانِي ب ْ سكِّينْ
تْرَايْنِي عَوَّرْتْ عَيْنْ العِينْ
ودَرْدَرْتْ الرْمَادْ ع ْ العَيْنِينْ
الدَّالْ حَطِّيتْهَا مَنْ سَعْدِي وكْفِيتْهَا ع ْ اليَا
ما قَلْتْ عْلِيَّ الحْرُوفْ
حْتَى شْكَاتْ إِ يدِيَا
ما مَلِّيتْ نْرَقَّعْ خْيَالَكْ ب ْ خْيَالِي
حْتَى حْفَاتْ عْوِينَاتِي
ما مَلِّيتْ رَسْمْ ظَلَّكْ
حْتَى وْفِيتْ الرِّيشْ
مَنْ جْنِيحَاتِي

آأخَيتِي .. لا تْحَسْبِِي ظَرْفِي خْدُوعْ
وِيلاَ جَاكْ
حَرْفِي بَعْدْ الغِيبَة
ونَاحْ عْلَى عَتْبَةْ بَابَكْ
حََرْفْ رْجَا وسْمَاحَة بِينْ كْفُوفَكْ
كَتْبِيهْ فْ السّْمَا
كَتْبِيهْ فْ المَا
حُطّيهْ بِينْ كْتُوبِي ومْرَاسْلِي
حُطِّيهْ جَنْبْ ْليَّامْ الفَايْتَة
دَفْنِيهْ تَحْتْ النَّخْلَة جَنْبْ سَّرْنَا الصّْغِيرْ
حَرْقِينِي حَرْقِيهْ
.سَامْحِينِي سَا مْحِيهْ
هَمّْي خَلِّيهْ غِيرْ مْعَ حْرُوفْ النْدَامَة
آاحْ آا خيتي آحْ
لُوْ لْيَّامْ
تَقْدَرْ ع ْ الرْجُوعْ
كُنْتْ نَعْدَمْ حْرُوفِي
نَقْرِا حْرُوفَك