سطر وحداني

موضوع: سطر وحداني 5/11/2009, 18:46

سْطَرْ وَحْدَانِي

دَفِّيتْ كْلامِي
بْرِيقْ لْسَانِي
عْلَى سْطَرْ وحْدَانِي
فَاضَتْ لَمْعَانِي
تَقْرَا لَكْفُوفْ
حَرْفْ وحْرُوفْ
الْخَوْفْ
جْلالَة عَلْ الْعَيْنْ مَا تْشُوفْ
الْخَابْيَة تْهَرْسَتْ شْقُوفْ
رْمُوشْ الْوَقْتْ سْيُوفْ
صْفَايْحْ مْعَلْگَة فْكْفُوفْ
لَبْرَا تَلْفَتْ فْالصُّوفْ

وغَارْ مَظْلامْ
فِيهْ كْلامْ وكْلامْ
فِيهْ الْحُرْ بالْغَمْزَة
فِيهْ الْعَبْدْ مَشَّگْ لَگْدَامْ
يْبِيعْ الْحَرْفْ بْخُبْزَة
لابَسْ بَلْغَة وسَلْهَامْ
الْمَخْيَطْ والشّْرِيطْ غُرْزَة
ظْلامَتْ بِيهْ لُفَّامْ
الشُّوكَة هَازَّة لَعْلامْ
والْبَاكِي فْزْمَانْ الْحَزَّة
سْلامْ الرِّيحْ جْرِيحْ
الْعُگْدَة مَرْبُوطَة بْلْسَانْ قْبِيحْ
شْرِيدْ فْقْوَالُو
عْنِيدْ فْهْبَالُو

رْيُوگُو تْسِيحْ
نَاسِي فْعَالُو فْگَالُو وگَالُو

لَهْمُومْ بْعَشْرَة
حَفْرُو حُفْرَة
دَفْنُو فِيهَا سَرْ لَخْدِيمَة
گْيَادْ مْدَسَّمْ
بْالْهَمّْ
بِيهْ سَوّْكَتْ حْلِيمَة
زَهْرَة طْفَاتْ الجَّمْرَة
فْعيُونْ الْگَمْرَة
ظْلامْ اللِّيلْ وعْثَرْ
عْلَى شُوكْ الْگَنْفُودْ
صْبَاحْ مَرْعُودْ
شَمْسْ حَمْقَة
نْهَارْ دَايْعْ فْالزَّنْقَة
الْعَيْنْ مْعَلّْقَة
والْحَلْقَة ضَحْكَتْ عْلَى كْتَابْ
وحْجَابْ
وغْرَابْ
وسْحَابْ
الجُّغْمَة حَارَّة
النَّظْرَة مَارَّة
النَّفْسْ زَايْرَة
قُبَّةْ لَحْسَدْ
حْنَشْ مْكَمَّدْ
اللَّفْعَة ضَرْبَتْ الطّْبَيْگَة
سَمّْهَا سَارَحْ
الْبَارَحْ جَارَحْ

الكَبْدَة فْالزّْحَامْ
دَمْ لَكْلامْ
اصْبَحْ مَجْدَامْ
شُوكْ القُوقْ
دَگْ الصَّنْدُوقْ
طَاحُو مْسَامْرُو
يَتْعَافْرُو
فْسْوَاقْ مَدْلولَة
بُوعْبُولَة
زْلَگْ فْجِيبْ الْمَزْلُوطْ
خَانَزْ الْبُوطْ
الرُّوحَانِي نَقَّزْ لَحْيُوطْ
مِّيمْتِي آحَنَّة
الضَّرْسَة ضَحْكَتْ عَلْ السَنَّة

اللّْسَانْ مَا بْقَاتْ فِيهْ بَنََّة
الْمَحْنَة، مَحْنَةْ الْفَتْنَة
قَطْرَانْ
كَانْ عْسَلْ الشَّهْدَة غَنَّا
كَانْ
لَحْبَقْ والْوَرْدْ حْتَّى كَانْ
فْجُوفْ إِنْسَانْ
خَانْ
الشُّوفَة فْوْجَهْ الزّْمَانْ
بْكَاتْ الْعَزْبَة فْمْكَانْ
بُوهْ يْتِيمْ
والضِّيمْ رْكَبْ الرِّيحْ
عَفْرِيتْ وَلْدْ عَفْرِيتْ
كَذْبَةْ أَبْرِيلْ

والدَّمْعَة تْسِيلْ
عْلَى خَذْ مَقْهُورْ بْالزُّورْ
واللِّي زَارُو مَقْهُورْ
مَنْ گَاعْ الْوَادْ الْمَنْسِي
كْسَاتُو مَاهْ
وخْيَالُو مَدْفُونْ مْعَاهْ
لابَسْ سَرْ
كْبَرْ مْعَانَا
مَا نْسَانَا
فيَّامْ.. وايَّامْ التَّخْمَامْ
.

موضوع: رد: سطر وحداني 6/11/2009, 12:24

صوت صادر من الأعماق بنبض ألما على الواقع ... لاحياة لمن تنادي ليبقى السطر الحرف الكلمة الصادقة غريبا وسط زخم من الرداءات ....إحترامي وتقديري

موضوع: رد 6/11/2009, 20:04

دَفِّيتْ كْلامِي

بْرِيقْ لْسَانِي

عْلَى سْطَرْ وحْدَانِي

فَاضَتْ لَمْعَانِي

تَقْرَا لَكْفُوفْ

حَرْفْ وحْرُوفْ

: : :

نعم للكلمة قوة التحدي والخروج معبرة عن الإحساس
أمام مخلفات حركات الأيام وسرعة نموها
مستعرضة خبايا معروضات سوق الحياة لتحمل القلم على التفاعل
مع ألوانها والبوح بمعاني تفيض كاس مداده ...

نص جميل ... مزيد من الكتابة والإبداع
مودتـــــــــي

موضوع: رد: سطر وحداني 22/1/2010, 11:14

السلام عليكم
نص جميل ومشحون بأغاز الحياة المعلقة.
نص يجعل القارئ مسجونا بين أول حرف فيه بين آخر حرف.
نص فيه من الدلالات التي نتغافى عنها رغم حضورها القوي في الحياة.
سلمت أخي ومسيرة موفقة.

موضوع: رد: سطر وحداني 30/1/2010, 18:33

اخواني الاعزاء

شكرا على مروركم البهي
زلكم مني كل التقدير والاحترام
مودتي