كلام كلامي

موضوع: كلام كلامي 4/11/2009, 10:01

كْلامْ كْلامِي

هَوْلِي مْهَوَّلْ
فْاهْوَالِي مَهْمُومْ
وسؤَالِي سوَّلْنِي بْسُؤَالْ
مَفْقُودْ

سْكَتْ سْكَاتِي
سَكْتَةْ الْمَضْيُومْ
وحَالِي تْحَوَّلْ حَالُو
مَنْكُودْ

سَرّْ اسْرَارِي
لَسْرَارُو مَعْدُومْ

بْالْكِيَّة تَكْوَى وكِيَّاتُو
سَفُّودْ

نْطِيحْ طَيْحَة
وطْيَاحِي مَرْدُومْ
فْگَاعْ گَاعِي والْگَاعْ
مَسْدُودْ

وْگَفْ الْوَاگَفْ
عْلَى وگَفْتِي مَشْؤُومْ
بْكِيتْ وبْكَى بْكَايَ
عَلْ لَخْدُودْ

شْكِيتْ وشْكَايَ
شْكَاهْ مَحْرُومْ
الشُّوفَة شَافَتْنِي والشَّايْفْ
مْگْيُودْ

رْحَلْ رْحِيلِي
بْرْحَالُو مَعْدُومْ
ولِيلْ لْيَالِيَ فْلْيَالِيهْ
مَشْدُودْ

اللُّومَة لامَتْنِي
واللايْمْ يْلُومْ
ولُومْتِي مَا لامَتْ اللايْمْ
الْمَحْسُودْ

مَالِي ومَالْ
مَالِي الْمَلْغُومْ
حْكَايْتِي والْحَاكِي لْحْكَايَة
مَا يْجُودْ

تْكَلَّمْ كْلامِي
كْلامْ مَكْتُومْ
وشُوكْ شْوَاكِي شُوكَةْ
الْگَنْفُودْ

زْمَانِي زْمَانْ
وزْمَانْ لْيُومْ
طْوَانِي طَيَّة مَا طْوَاهَا
مَعْبُودْ

حْسَبْتْ حْسَابِي
ولَحْسَابْ مَخْدُومْ
وسْرَحْتْ نَسْرَحْ سْرَاحِي
مَحْدُودْ

غَنِّيتْ غْنَايَ
مَا غَنَّاتُو كَلْثُومْ
كْتَبْتْ كْتَابِي فْكْتَابْ
لَجْدُودْ

الْخَطْوَة خْطَاتْ
خَطْوَاتِي فْالشُّومْ
وصْدَاعْ صْدَاعِي فْصْدَاعُو
بَارُودْ

مْنَامْتِي فْلَمْنَامْ
مْنَامَةْ الْمَظْلُومْ
ورِيحْتِي رَاحَتْ بْرِيحَةْ
الْوُعُودْ

صْبَاحِي صَبَّحْ
صْبَاحُو مَسْمُومْ
وطْرِيقْ طْرِيقِي مْطَوّْقَةْ
لَحْدُودْ

فَالِي فَالْ
والْفَالْ مَجْدُومْ
وحَقْ حَقِّي بِينْ لَحْقُوقْ
مَعْگُودْ

عْلَّةْ عَلاتِي
عْلَّة تْعُومْ
وشْقَايَ شَاقِي والشّْقَا
مَزْنُودْ

الْغُرْبَة غْرِيبَة
فْغُرْبْتِي تْحُومْ
وحْمَاقْ حْمَاقِي احْمَقْ
مَرْعُودْ

طَلِّيتْ طَلَّة
وطَلانِي مَصْدُومْ
الْوَاقِعْ وَاقِعِي ووَاقعْنَا
مَمْدُودْ

قْرَيْتْ قْرَايَةْ
الْقَارِي الْمَعْلُومْ
ولْگَانِي مَلْگَايَ فْمَلْگَى
مَجْبُودْ

شْرَبْتْ شْرَابْ
شَرْبُوهْ الرُّومْ
دَخْتْ دَوْخَة ودَاخْ
الْوُجُودْ

تْفَكَّرْتْ افْكَارِي
والْفِكْرْ مَقْسُومْ
فِكْرَة وفِكْرَة والْفِكْرْ
مَجْلُودْ

حْرُوفِي حَرْفْ
والْحَرْفْ يْرُومْ
السّْطَرْ مْسَطَّرْ سْطُورْ
الدُّودْ

الإِبْدَاعْ مُبْدِعْ
بْدَعْ نْجُومْ
طْفَاهَا طَافِي وطْفَاتْ
بْالْجُمُودْ

سْكَنْتْ والسُكْنَى
سَاكَنْهَا الْبُومْ
كْبَرْتْ وكُبْرِي كْبَرْ
مَعْدُودْ

يَا خَالَقْنِي وخَالَقْ
الْمَخْلُوقْ مَلْهُومْ
ارْحَمْنَا بْرَحَمْتَكْ وبْالرَّحْمَة
جُودْ

زْرَعْتِينَا زَرِّيعَة
وزَرْعَكْ مَشْمُومْ
ولَفْعَالْ فْعَالْنَا والْفِعْلْ
لَدُودْ

لَبْحَرْ بَحَّارْ
فْبْحُورُو يْعُومْ
والسّْمَا فْسْمَاهَا سْمَاتْ
بْلا حْدُودْ.

موضوع: رد: كلام كلامي 4/11/2009, 21:23

بوح عميق يفصح عن كثير من المعاناة...ويبقى الأمل كبيرا في رحمة الله ...إيقاع يأخذ حتى آخر نفس بكثير من الإنسيابية ....شكرا أخي محمد مومر ...مودتي وتقديري

موضوع: رد 5/11/2009, 19:28

لَبْحَرْ بَحَّارْ
فْبْحُورُو يْعُومْ
والسّْمَا فْسْمَاهَا سْمَاتْ
بْلا حْدُودْ.

:::
صور فنية لها من الحكم ما يميز شعريتها
ويرحل بادراك المتلقي عبر معانيها
الى مستوى ابداعي جميل

تحيتي الفنية

» كلامي
» هذا كلام
» كلام محتار
» كلام الليل
» كلام المهموم