عكوب الليل....

موضوع: عكوب الليل.... 2/11/2009, 17:19

عْگُوبْ اللِّيلْ

فْرَحْ عْگُوبْ لِيلِي
وسْعَدْ رْگَادِي
وضَحْكَتْ رْگِيگَةْ لُوشَامْ
فْحْضُنْ مْجَبَّدْ مْكَمَّدْ
فْفْرَاشْ بْرَّانِي

تْعَلَّمْتْ مَنْ دْرَاعَكْ
وشْوَارَكْ
فَيَّقْ شْوَارِي
الْمَغْرُوسْ فْجْنَانْ مْحَانِي

شْرَبْتْ مَنْ كَاسَكْ
وَاسَانِي
فْلَبْعَادْ ولُقْرَابْ
وثُوبْ الْوَقْتْ
عَلْ لَغْدَرْ مَا غَطَّانِي

سَرْتْ نْقَلَّبْ عْلَى خَطْوَاتَكْ
فْمْرِيرَة عَوْجَة
فْدْرُوبْ نَاعْسَة
فْعْقُولْ تَايْهَة
لْگِيتْ خْيَالَكْ يَبْكِي عْلَى خْيَالِي
بْدْمُوعْ بَكَّانِي

رْگَدْتْ فْغَفْلَة سَاهْيَة
فْگَرْبَةْ گَرَّابْ عَطْشَانَة
فْيُومْ شَمْسُو غَطَّاتْهَا
فْعَالْ حَگَّارَة
حَرْگَتْ ازْهَارْ جْنَانِي

كْتَبْتْ بْرَيَّة عْلَى زِيفْ
خْفِيفْ
وخَفَّةْ اوْزَانُو
مَا قْرَاتْ جْوَابِي
بْالْحَرْفْ الْمَكْتوبْ
والْمْقَدَّرْ
شَافْتُو عَيْنِي الْبَارَحْ
فْزِيفْ عَدْيَانِي

غْلَبْتْ نَفْسِي فْرْمَادْ عْوَافِيكْ
ونَارْهَا مَا دَّفِيكْ
نْخَافْ عْلِيكْ
منْ رِيحْ مَشْرَارَة
مَنْ ضُرْ عَرْيَانْ
وضُرِّي عَرَّانِي

بِينْ شْوَارْ حَسِّي
وكْلامْ نفْسِي
تْسَلَّلْ
خَيْطْ الرُّوحْ
مْغَلْغَلْ
مْكَبَّلْ
بْكْبَالْ مَمْلُوكْ

بْجْنُونْ الْوَقْتْ
وعْگَزْ لِيَّامْ
رَاجَلْ شِيبَانِي

الْعَيْنْ نْزَاهَة
والنْزَاهَة مَخْلُوعَة
مَنْ الشُّوفَة
الْعَيْنْ خْمَاسِيَة
بَارُودْهَا مْسَتَّفْ فْجْعَابْهَا
مَحْسَادْ مَغْيَارْ
عَيْنِي هَرْبَتْ عْلِيهَا
غَطَّاوْهَا حَجْبَانِي.

موضوع: رد 2/11/2009, 21:15

أخي الزجال محمد مومر
جميل ما نقشت في هذا النص الزجلي من معاني فنية
تشد المتلقي للتفاعل مع مضمونها بكل عشق
تحياتي الفنية

موضوع: رد: عكوب الليل.... 3/11/2009, 17:40

اخي المحترم بنعيسى الحاجي

شكرا على تشجيعاتك وصدق احساسك ...
مودتي

» تراتيل الليل
» كلام الليل
» فضل في صلاة الليل
» اغاني الليل
» نزيف وحي الليل...