راسي يا ذاك الراس العريان
شكون يغطيك؟
فينما لحت عينك ف هذا الزمان
ما تلقى غير لي يعريك
الضحكة الصفرا
و الناب كبير
الزواق و الهضرة
و الزواق يطير
دير راسك ف راسي يا راسي
و شوفها شوفة العقل
وجوهم باردة و القلب كاسي
و نفاقهم ف الضحكة يحجل
مديتي يار راسي لهم لحبل
طلعوا من البير و مدوا لك الشريط
يتقطع ف يدك و تحصل
يردموه فوقك و يبنيوا الحيط
شوف راسك يا راسي
راه زمان ما كاين غير راسي
راسي يا ذاك الراس العريان
واش من حروف هي تدفيك؟
سر لقصيدة غبر ما بان
و المعنى طج و سمح فيك
الحروف كاسية باردة
و ظلك ما بقات تدفيه محبة
الوجه مصبوغ صباغته واجدة
طارت الرفاقة و مشات الصحبة
دير راسك ف راسي يا الراس
و خلينا نعديوها
سوم الكلمة الحرة رخاص
الوجوه الباردة نخطيوها
و غير فيق يا راسي
لحلا م دراتها ذيك الريح
نتوجع من راسي لساسي
خيل لمحبة هربان يطيح
فيق و فيق خيالك
ما تخليه يكون بحالك
ما تكون شلخة ف سعد المنجل
جمع حروفك الا قاد
لي قراك لا تقراه،خليه يهضر
كن عافية ما تكون رماد
كن فران قاد بحومة راسه
خبزك فطير صوط عليه يطيب
نغز راسك و خليه يدخل سوق راسه
قتل لحمامة فيك و خليك ديب
خلي الشوفة فيك رحى
و زرع ف وذنك مقص
طحن لحروف و بدا بالحا
قطع البا لي خلاتك ف الدص
خلي لسانك منجل
و نادر الصحبة شعله و دفا به
سرب خيط الخاوة ينسل
كبة مخبلة ما تخيط به
و غير شوف يا راسي ف راسك
ما فيقاتك رعدة،ما وقضاتك رياح
حالم ف فياقك و نعاسك
ما ريحتيني ما قلت : نرتاح
الرئيسية 
