خرافة منسية...

موضوع: خرافة منسية... 31/10/2009, 11:04

خْرَافَة مَنْسِيَّة

تْقَطْعَتْ لَحْبَالْ
وصْبَحْ لَهْبَالْ
حَدِيثْ ومُوَّالْ
بِينْ صْبَاحْ وعْشِيَّة
غْرَقْ السُّؤَالْ
يْتِيمْ مَنْ شْحَالْ
سَمْعُو يَا الْعُقَّالْ
خْرَافَة مَنْسِيَّة
سْنِينْ طْوَالْ
جْوَابْهَا مُحَالْ
هَرْبَتْ لَغْزَالْ
مَنْ الْغَابَة الْمَحْضِيَّة
الْوَرْدْ ذْبَالْ
ونَاسْ الْحَالْ
كَتْبُو لَقْوَالْ
عْلَ لْوَاحْ مَقْرِيَّة
ضْرَبْتْ الْفَالْ
فِعْيُونْ الْغُرْبَالْ
لْقَيْتْ الرّْجَالْ
عْلَى بْلادْهُمْ مَجْلِيَّة
كْتَافْ الْحَمَّالْ
هَدَّتْ لَجْبَالْ
سْنِينْ طْوَالْ
حْقُوقْ مَنْفِيَّة
حَتََّى مَنْ لَخْيَالْ
فْقَدْ الأَمَالْ
وحَطّْ لَرْحَالْ
فِشْعَابْ مَلْوِيَّة
لْفِكْرْ زَلْزَالْ
واللّْسَانْ طَبَّالْ
كْلامُو بْلا أَفْعَالْ
مَا عَنْدُو نِيَّة
تْشْغَلْ الْبَالْ
فِالزّْمَانْ الدَلَّالْ
مْعَانَقْ لَهْوَالْ
مَحْرُوقْ بِالْكِيَّة.

موضوع: رد 31/10/2009, 18:46

نص زجلي جميل بصور فنية
تخفي شعريتها بين خبايا السطور وتلك غاية القلم ...
مودتـــــــــــــي

موضوع: رد: خرافة منسية... 31/10/2009, 20:33

فعلا
ولاّت خرافه
فزمان الجرا
منسيه
فين لعقال
والشـُّرَفا
اللسون طوال
والظهور محنيه
تَ خّرْ الزمان
فين الصدق ولوفا
تحيتي لحرفك النابض بحال الحال...مودتي

موضوع: رد: خرافة منسية... 2/11/2009, 13:39

السلام عليكم،
قصيدة زجلية الحكمة بعبق أسلوب عبد الرحمن المجدوب، أخترتم لها قافية لامية و ذيل ياء مرتبطة بتاء التأنيث، و هي أقرب لأغنية منها لقضيذة زجل مجردة... سهلة النطق بعبارة التليغرام السريع الطلقات، المؤسس على مبنى سلس و معنى واضح لا لبس فيه...
دمتم أوفياء للزجل...

موضوع: رد: خرافة منسية... 2/11/2009, 17:11

شكرا على مداخلاتكم النيرة

مع كامل تقديري و احترامي

» قصة منسية
» ما يرضي خرافة هذياني
» خرافة عشق على الطريقة الهندية