الزهر ف الدنيا شبكة
و كلها و صيده
هذا بصندوق هذا شركة
و هذا صَيْدُه مْصَيّْدُه
الهم الا كثر يضحك
و الضحك الا قلال يبكي
جوع الجيب يفضحك
و زهرك الراقد متكي
السوق فيه و فيه
و سوم بنادم ف زمانا رخاص
قليل العفة راك تشريه
بصوته و لسانه و حتى الضراس
لكلام لمسكي بالتمحليس
الطير الحر ما يذوقه
و رفاقة المخزن و البوليس
مجراب غير خرج سوقه
اليوم غدا و لا دابا
كون انت ما تكون مشري
الجيب المذهون يا بابا
مكسي بالحرير و يبان معري
الا حطوا العصا فوق راسك
قول: نعام و ما تقول :لا
غمم الراس و زيد ف نعاسك
و قول هذا سيدي و هذه لالة
فهمتك يا الفقيه
و فهمت الدرس
لساني نمشي و نخليه
و نقطع الحس
ما حاس بالمزود غير لي شاده
و ظهرك بطانة يا المخبوط
الزمان الكارح يزيد تنهاده
تشرب لمرار يا المزلوط
شفت شعرها طويل و معقود
قلت :آجي نكمل ديني
لقيتها راجل سميته محمود
الزمان ماسخ غير خطيني
دير الخير ما يطرى باس
راك ف يوم تحصده غلة
ف هذا الزمان الناس بالناس
تدري الخير و منه شلة
الهم ف قلوبنا حيطه عالي
ما تريبه غير لمساوية
ما ينفع هروب للثلث الخالي
خلي لحلام وسطنا داوية
الخوف مجراب يعادي
و الذل بالخوف حكة
و الا مولاه راضي
تمة تزيان له البركة
اليد لي تكتب بالمداد
ما تعرف تذبح
تزرع المحبة ف لبلاد
و الخير ف ترابها يسرح
يا خيي يا الكارهني
ياك غير كلام و كان بينا مشروك
لكلام فيه و فيه فهمني
كلمة موردة و ف جوفها راها شوك
يا الحالم بالطلوع
درجة درجة توصل
الا طلعتي مسروع
ف يوم تطيح و تحصل
لكلام لحلو برا و خيط
يرقع التوب و يصالحه
حرف لمرار غير حيط
الشق ف طوبه و فاضحه
كبرتي و كبروا لكتاف
و قلتي: آجي يا راسي شوف راسك
الزمان يمسح بك لرض جفاف
و العين محلولة ف نعاسك
و غير سير و سير و كان
ضحك و العب الا عطاتك
يمكن الفرحة تهجر لمكان
و ف ساعتها راها نساتك
الباب المسدود
ما تعرف وراه آش جاري
كيف لوجه لمهدود
هاز الكية معاه و يداري
الدنيا حبل ع العنق و مفتول
مبروم بالشكارة و لفلوس
الا عطاتك يترخف محلول
و الا تزير ،الجيب مسيوس
يا الداخل لذيك الخيمة
لقبة لمان و تحلف بلحلوف
تبات لحقوق ف جوفك نايمة
و تشوف بنادم بهيمة و حلوف
لي قال لك سيدي اليوم
غدا يقولك :آرى
حتى السلام ولى مدهون
و الضحكة ف الفم حزارة
دخلت سوق بنادم
قلت :آجي نتقدى لي ينفع
لقيت لقرش هو الحاكم
و الفاهم ف عينهم غ كيرﮔع
ظلام النفس عرى
و سعداتك يا لمكسي بحب الله
حط رجاك فيه تبرى
و لي يسبح ف الشدة ما ينساه
عريان ف نهارك يا ذاك لمكسي
حرير الدنيا حده فيها
الروح طايرة تصبح ما تمسي
و ريح الموت تعريها
درجة درجة تلقى راسك لهيه
بارك بركة و مستوي
الرزانة توزن كلاسك تحليه
تواطي الجبال ملي تدوي
دم واحد يجري ف العروق
كلنا جينا و نرجعو للتراب
لا تقول هذا تحت و هذا فوق
خبزة هي، مقسومة بالحساب
الكلام مهرسة حروفه
ما تجبره غير الهمة
الا تسمقل بخوفه
يموت و يبقى تمة
الفقر سبع و غول
يتسيف و خَوَّفْ
مول الشكارة و الجيب محلول
يسرط الفلس مْهَيَّفْ
سوق يا السوق
يا لمدخلني سوق راسي
الا شريت راني لفوق
و الا بعت الله يحد باسي
لي بحالي ما يدخل لسوق الديابة
الا كان نابك طويل خبيه
السوق غير سوق يا بابا
مهدوم الفم ما يحلم به
يا لمعول على ذيك المطفية
قال يسقي عروقه و التراب
قلبك كدرة و مكفية
يمكن ما ترويها السحاب
ربيت الريش و قلت :نطير
و الدنيا مقص ماضي
طار ريشي ع لحصير
ما طرت ما بركت و انا راضي
كلما نقول تقاضات لهموم
نلقى راسي مشمر لي هم جديد
كل هم بضرباته مسموم
ينقش طرقان هي و يزيد
قال يبيع لحروف
و يشري راسه
ع ما كثر فيه الخوف
و تخلط الهم بياسه
الرئيسية 
