كِيَّاتْ الرُّوحْ
الزْمَانْ يْلاكَي
اللي مَا يْتلاكَى
يْصِيْدْ لعْقلْ
وْمَا تنْفعُو حْدَاكَة
....................
الزْمَانْ يْخْوّضْ صْفايَا
يْمرْمدْ الرّوحْ يْرْدهَا شفَايَة
خْليتْ الهْمْ بْعِيدْ
وْحِينْ نْتلفّتْ نْلقاهْ حْدَايَا
.....................
صْدرْ لوْرقَة حْنِينْ
الرْكدَة بينْ حْضَانهَا تفاجِي
حَايرْ نبْدَا مْنينْ
عْذابْ لحْرف مْكضّرْ مْجَاجِي
يْضِيق بيَّ الحَالْ سَاعْة نْراكْ
فْ سْرَابْ تنَاجِي
تيْبسْ فْ حْلقِي شْجْرة لكْلامْ
وْيزيدْ صْدُودْكْ فْ هيَاجِي
شْحَال يَا طريقِي وَانَا فِيكْ نْسْكمْ
وْانتِي غِيرْ زايْدَة وْتعوَاجِي
شحَال مْن حْلم فْ جْنَابْكْ تحْطمْ
ذبْلتْ زْهرَاتْ لعْمْر بْ سِير وَ اجِي
..............................
بْغيتْ هْنايَا يهْجرنِي
تْتسيّف يَّامِي بْ سِيفة لحْجْرْ
ايلا نَا كنْتْ كاذبْ فْ قوَالِي
بْغيتْ قلبِي يْنكرْنِي
و يوْلي فْ دْخالِي خنجْرْ
يْصِير طعْنَة تعْجّلْ بْ زوَالِي
مَا ظنيتكْ بْعد لمْوَالفَة تهْجْرْ
تْضْياق شُوفْتي، وعلا من ْ تْعْوالِي
بَاشْ مْن حَالة نْلكَى لفجْرْ
يَا سَاعَات الظلمَة غِــيرْ طـــــــوَالِي.
الرئيسية 
