الغــَـــابَة
وَاخَّا دْمْ الشجْرَة سَايلْ
مَازالْ وْرَاقـهَا تتــْـمَايلْ
الحْطابْ مَالِي الغابَة شجُونْ
طولْ نهََارُو صَايْل جَايْلْ
النْسرْفْ عْشو مْسْــــــــجُونْ
البُومْ بينْ لغصَان تتخَايْلْ
الضْبَاعْ فْ قصَارَة وْ مْجُــونْ
لغزلانْ عْلى عِيشهَا تتحَايْلْ
* * *
طرْقانْ الغابَة عُــــــوجَة
و حْيُوطهَا رَابــْـــــتْ
لغرسْ عْصْفتْ بيهْ مُوجَة
خمْدتْ نوَارُو وْ غابْتْ
الروَابي بْخيط الشّومْ مْنسُوجَة
الشوكْ فْ حْوَاضْهَا نابْتْ
* * *
الحْكَرة فْ غابْتنَا عَادَة
النمْر مْلجْمَاهْ جْرَادَة
الخْنزيرْ فْ سِيرُو يْتهَادَى
مْختالْ مَا مْبَالي بْجْنابُو
غادِي فْ ظلمُو يتمَادَى
فلْحُوم طريّة غَارْز نَابُو
* * *
لطيَارْ فوْكارْهَا مْلمُـــــومَة
مَادَّاتْ خبَارْ مَا جابْتْ
بْقــيُودْ لمْدلة مْحْكـُــــــومَة
تمْنات الرْحِيلْ وْ مَا صَابْتْ
مْعدنْهَا رْخاصْ فْ السُّومَة
فْ رْبيعْ شْبَــــــــابْهَا شَابتْ
* * *
هَاذ الغابَة مَا تلـِـــــــــــيقْ
للّي نفسُو حَــــــــــــــــارّة حْبيبَة
غَارْق فْ نْعَاسُو كلمَا يْفِيقْ
يْوْجدْ رَاسُو مْشدُودْ بْسْلاسْل السِّيبَة
شِي دَارْ مْنْ صُُوتو طريقْ
وْشِي دَارْ مْنْ صْــــــــــمتُو وْجيبَة
الرئيسية