المرأة التونسية ...الفطرة التي غلبت السمسار !!!

المرأة التونسية ...الفطرة التي غلبت السمسار !!!

*بقلم : نصرالدين

تونس، هذا البلد الجميل من يعرفه جيدا يخاله نموذجا مصغرا من هذا العالم الفسيح فعلى صغر حجمه تحمل أرضه نماذج المعمورة :
فهذه صحراء وسهول وجبال .. وتلك تضاريس وغابات وسباسب عالية ومنخفضة ..على إختلافها حطت رحالها هنا، وإن سألت عن مناخها فصيف "البرمة" حرارته فوق الخمسين وشتاء" تالة "تحت العشرة درجات والثلج عشق هضاب هذه البلدة وعشقته فتلازما في تزاوج بديع..
كثر هم الذين حطوا رحالهم هنا، رومان وفنيقيون وبربر وعرب صهرهم التاريخ في تجانس بديع هذبه الإسلام وضمد فواصله ونفى عنه الخبث.
هي هذه الخضراء.. شامة معلقة في جبين إفريقيا وعينها الحوراء التي ترقب بها المتوسط.
طالما حاولوا إستمالتها وتلويثها وطالما راودوها عن تغيير قبلتها فأبت واستعصت ، ثم ما لبثوا أن ذهبوا وبقيت!! ومن فرط حنانها أن اسكنتهم دفء ترابها وغطت قبورهم ببعض من العشب والعوسج والنوّار.
فهيا نستسمح هذه الدوحة الخضراء ونلج برفق من بوابة صحرائها لنعاين بعض ما تعودت عليه من شغب مستنسخ دخيل.

الحصّادة في وجه الريح!!!
نحن الآن على مشارف معتمدية الذهيبة من ولاية تطاوين ، هناك في زاوية من زوايا المفترق نلمح امرأة منتصبة تلامس عامود الإنارة وتباعده ، بيدها دفتر وقلم ، تحاول التودد لبعض المارة ، وهاهي تظفر بسيدة وتبادرها بالسؤال:
*يامَدَامْ دقيقة بربي
*تفضل
*نحن مجموعة نساء نناضل من أجل القضاء على غطرسة الرجل وجبروته ونريد ان ننهض بك وبغيرك ..
*كَانِكْ عليَّ أني بنوض من الصباح ملي نْفِيقْ نصلي الفجر ما نرجعش نُرقد
*علاه انت تَعْبَانَه هكا وينو سي الشْبَابْ راجلك
*الحق الحق هو ما هوش شْبَابْ اما أني راضية بيه وراه يفيق بكري يسبقني للحصيدة وأني بنخلط عليه
* توقعلي يعيشك على هالائحة؟
* لاَيَحْتْ أشنهو ..لوح علي غادي من اللّوايح..ماعادش عليًّ بكري حِِمْيتْ علي القايلة باش نلْحقْ بن عمي نعاونو..

إلى الطريق...ما أطيب اهلك يا "ذهيبة"... بهذه الطمأنينة المرسومة على الوجوه رغم شظف العيش وقساوة الحياة نودعك لنستلم الطريق الذي سيسلمنا بدوره بعد مفترقات وانحناءات ومسافة ليست بالهيّنة إلى الجريد على مشارفه لم ننتبه "للترقيم الكيلومتري" إنما تحسسنا قرب المنطقة برائحة النكت المنبعثة من فضائها... من لا يعرف النكتة الجريدية هذه الماركة المسجلة فقد فاته الكثير في فن المزح والترويح ، حتى ان الحجر والحصى المتناثر على حافة الطريق تلبسته النكتة لتدفع عن المارة قساوة الظلم ومرارة الإبتزاز عند كل الحواجز التي مروا ويمرون بها وتطعّمهم بجرعة من الأمل ليستعينوا بها على بعض الطريق .

الأولويات المغيّبة في مهب نضال التخمة والترف
لم يمر الوقت الطويل على ترحيب توزر بنا حتى لاحت لنا سيدتان واحدة تعالج بعض الأوراق لعلها كانت تعد غنائم اليوم ، والاخرى تسمرت امام محل لبيع المرطبات لا هي إشترت ولا تحولت عن واجهة المحل ليسترزق الرجل ، هي تكرر "يا مدام دقيقة" ..وهو يردد "هَالدَّعْوة منين جتني" وكأنهما يتجاذبان الزبائن هذا لتسويق "الألف ورقةMille feuilles" وتلك لتسويق "النضال"...كانت امرأة تهم بدخول المحل حين إقتنصتها مبادرة:
*عَسْلامة
*الله يسلمك
*أنا معي لائحة من أجل المطالبة بالتسوية في الإرث ومنع الرجل التونسي من الإنفراد بالملايين والمليارات والبليارات والعقارات المنقولة وغيرمنقولة...
*باهي برشة
*إذا وقعلي هُونِي
* إنت تحبي "تُوَدْرِينِي"
*علاه
*أنا بُويَا مات وما خلاش إرث إلا ّ أمي عندها الكلوة تغسل و تصفي ديمة ويلزمها فلوس وعندي أختي مُعَاقة إعاقة تامة هما الاثنين عند خويا لكبيرإلِي يخدم في السْوَانِي وكاري حوش قديم ياسر، إذا تساوينا في الإرث يلزمني نأخذ وحدة منهم ونخرج من حُوشُو...وعندي نصيحة ليك مالتَّعبِيش روحك ياسر لأنو 95% من الشعب ما عندك ما تورثي منو …شهار ..كمبيالات…مرهون …موسال ..كريدي ..سلف..وثمة شكون مات ما عندوش حق اللحُودْ غطوه بفرشات مغشوشين ، ثلاثة ..أربعة بالات تراب تكسروا ولو ردموه هكاكا غير إكرم الميت بركة ، أما 5% لخرين إللّى أصابتهم تخمة الاموال والثروة فاتهني عمرهم ما سمعوا بحاجة إسمها إرث ولا يعرفوا ذكر ولا أنثيين… إمشي أختي نَاضْلي باش يتوجد الإرث هذا... وبعد تعالي اناضلو على قسمانو مع بعضانا..ياخي انَّاضلُوا على حاجة مثماش هاعباد ربي!!!... في لاَمَانْ أختي.
هكذا كانت الرحلة الى بنزرت عبر قفصة والقصرين والقيروان مرورا بالساحل والوطن القبلي والعاصمة.. نختصر الطريق ونجمل الأحداث

إمراة فاتتها عناية الرئيس وأدركت أبناءها
*إسمع يا..آشْ إسمك..جيتك بكنز من بنود وثيقة بيكين تكسري بيها كبرياء الراجل ..هيا وقعليِ هُوني..
*راجلي الله يرحمو عند سبعة سنين ملي مات..خلالي أربعة أولاد
*ممتاز على الأقل تخلي ذريكْ مَسْطرة ما يتعبوكش وتروضيهم لزوجات المستقبل
*ذريا الثلاثة في الحبس
*شبيهم مجرمين ؟
*واحد قالولي خوانجي ظلامي يحب يرجع للعصور الوسطى ميتافيزيقي متخلف متآمر ونحنا بلاد تقدمية.
*بعد مدة شدو الأخر هَاوْلاَدِي شْبِيهْ ؟..قالولي ملحد شيوعي تطاول على الشريعة الإسلامية السمحاء ويطعن في السادة العلماء.
*نهارات و شدو الثالث وَاشِي زَادَة ...قالوا إنتهازي وسلبي كي بيه كي بلاش موتو خيرمن حياتو يعرف كان ينكت ويمس اعراض الشخصيات المرموقة..ويقول أنا مسرحي وهومايجيش حتى سارح.
* باهي والرابعععععععععععع...
*الرابعععععععععععععع حرق ليطاليا غرق في البحر كلاه الحووووووووووووووووت.

فرصة سانحة للنضال أتلفتها "المكينة"
*تعالى أختي وقع على اللاّئحة باش راجلك يشعف ما عادش يمد عليك يديه
*لا أختي ما نستحقش .. راجلي ما عندوش يدين!!! قصت هملو المكينة في معمل السيمان...عاوني بحويجة ماني أختك في النضال
*علاش راجلك ما عطوشوا شهرية مُقْعدْ؟
*لا أختى لا مقعد لا متكي ، بعد شهرين من الحادث قالولوا ارجع للخدمة قالهم كيفاش نخدم بلا يدين قالولو أخدم في الصيانة عبي فمك بالشحم وشحم الماكينات ..ماحبش سحتوه..شكا للمعتمد ربي يبارك فيه ساعة ساعة يعطينا شكارة سميد!!!

جلّ من لا يخطئ...
*عسلامة ..يا بنية يعيشك تدعم هالائحة باش ننتزعوا بيها حقوق المرأة من بين براثين الرجل
*مشني بنية
*مالا شنو مِثلِ..يعني راجل عندك ميولات أنثوية ما يهمش مارس حريتك المهم إنت سعيد بِهَاشَّئْ
*أختي انا لاني مثلك لاني مثلو لاني مثلها اليوم دِرْبي يعني مَاتِشْ جِوَارْ والحالة مْرَفلة لبست دبش أختي وعملت بيريك باش كي نمشي للماتش نمنع من الرافل..يعيشك براثين الكلمة هذي مانعرفهاش!! حاجة باهية وإلا خايبة؟
*حاجة هايلة ياسر
*مالة يعطك برشة براثين..ونحن إن شاء الله ديمة مبرثنة عنا..

مأساة تجاوزها النضال!!!
"مناضلة"تعترض سيدة هائمة في الشارع
*يا مدام إيجا..إيجا
*نحوا لحجر..نحوا لحجر…وخرجوا هملي من القبر
*شنوه
*نحوا لحجر..نحوا لحجر…وخرجوا هملي من القبر
احد المارة من نفس البلدة بصدد عبور الطريق مع إبنه الصغير يتدخل:
*راك تكلمي في مجنونة يا أختي..هذيكا تصَدَّعَتْ دارهم في الفيضنات قدموا ملف باش يصلحوها وعدتهم الجهات المختصة………… بقوا يستنوا عشرة سنين نهار مشت تزور في أختها رجعت لقت خمسة أولادها وراجلها طاحت عليهم الدار..ماتو الكل ..هبلت عاد.
المرة هذية السلطات حست بتقاعسها في تصليح الدار..حست ياسر.. فعجلت بتعويضها... عطوها سَدّايَهْ باش ادَّبِّر بِيْهَا راسها !!! مَهبولة تْسَدِي يا مْهَبْلَة...بربي عاونها بشوي فلوس يا مدام
*لا خويا الاموال إلي تعطي هالنا الدولة وتأتينا من الخارج مخصصة للأسرة
*حتى هي أسرة أختي مالا معصرة
*الاموال هذي متاع تأهيل وترشيد وتحسيس
*علاش ما تكونش متاع توكيل وتشريب وتمريض؟؟؟
* "باردون" خويا هذي الاموال مخصصة لهدف سامي
*هدف سامي؟؟..!!! هايا هيا يا سامي ولدي خير ما تسكّر علينا الكوشة!!!

عَرَقٌ في صندوق التضامن..وتضامن في جيب النظام!!!
منطقة أخرى ..مدينة أخرى ..حي آخر..وشارع آخر
*وقعلي..وقعلي هوني حتى نجبرو زوجك على اعطائك الشهرية في يدك وتخصيص الوقت الكافي لشؤونك الخاصة...
*صعب لأنو يخدم عليّ وعلى غيري 16 ساعة في النهار
*راجلك معدد يصرف على وحدة اخرى؟
*أكثر...
ما تقوليش يصرف على أربعة؟؟؟
أكثر..راجلي لمَكْسِبْ لواج يصرف بيها على ثلاثة وخمسين
*كيفاش؟
*إي نعم ماني أنا وحدة زيداهم 26 و26 ولوش53 مالة صواردو قاسمهم بيني وبين الصندوق.

أمريكا تناضل مع النضال!
*يا بنات ..يا بنات إيجاو..إجاو وقعوا على حاجة تخصكم
*رانا مزروبين ثم تجمع إحتجاجي أمام السفارة الأمريكية هيا معانا باش نعطوا للسفير الامريكي لائحة إحتجاج وبعدين نوقعو معاك
*بروا إنتوما أنا البارح برك كنت عندو!!!
*عطيتيه اللائحة مَالاَ ؟؟؟
*لا هو إلي أعطاهالي!!!

بروسترويكا الجسد
*يا بنية توقع على حرية المرأة في العلاقات الحميمية المتعددة والغير مقننة…
*شنوه ؟
* ندعوا إلى حرية المرأة في جسدها بعيدا عن تسلط الأب والزوج والأخ ..تصنع به ما تشاء ، تبيع ، تكري ، تسلف ، ترهن ، الطير، تحط ، تنفخ ، تفش... هي حرة…
*واش معناها هذا؟؟ وإنت أصل شكون؟؟؟
*أنا إمرأة تقدمية أمارس النضال
*سامحني يا مدام هذا ما إسموش نضال …هذا إسمو تشويش في الطريق العام مع السّكر الواضح.

النضال تصالح مع البورجوازية
*إسمع إسمع يا مدام إيجا وقع على هاللائحة اليد في اليد نتكاتفوا باش نصدو غطرسة واحتكارالراجل.
*إي نعم نبصملك بالعشرة بارك الله فيك أختي مالا إذا المثقفات كيفي وكيفك ما يتصدوش للراجل إللي يمارس إحتكار السلطة والمال العام وموارد البلاد وتبييض الاموال وتجار العملة الصعبة العابرة للقارات وتشويه صورة لبلاد بسرقة بطّوات الدول الصديقة... لو كان مشني أنا وانت نوقفوا أمام غطرسة الراجل إلي يستعمل أجهزة الأمن الوطني لقمع المواطن وتفكيك منظمات المجتمع المدني ويستعمل المخابرات إلِّلي تغيرت وجهتها من جهاز وطني يسهر على مصالح البلاد ويدفع عنها المؤامرات إلى جهاز خاص يفبرك القضايا للمعارضة ويعشش فوق المساجد وفوق مقرات الأحزاب والهيئات المستقلة..إذَا كان مشني أنا وإنت,,
* وقف وقف وقف شنو هذا ؟؟؟ اللائحة بريئة من هذا ..تعرف إنت قاعدة تمس في السيادة الوطنية
*لواش قصدك إللي ذكرتهم مهمشي رجال!!! وإلا إنت قصدك باش نوقع ضد لمرماجي والقهواجي والبناي والفلاح والتكسيست واللواجيست والبطال... باش إطّلقهم نساهم ويبقوا لولاد ملوحين ..هذا نضالك واش قالك ..برا ناضل أحسنلك ضد غلاء المعيشة والبطالة والقروض إللي لا نعرفوا مصدرها ولا مآلها نفيقوا كان بيهم يطلبوا منا المزيد من التقشف باش انخلصوا القروض!!!هَيْ وقتاش خذيتوهاأصل ؟ وين هي ؟ حتى صوتها ما سمعناشوا وإلا ما فيهاش الصرف الكلها أوراق ما تقَرْبَعشْ؟؟؟

خارج الموضوع
*ها هي أخرى أنهكها التعب والإفلاس ولائحتها تحت إبطها تقف أمام إمرأة تحرس بعض الأحذية القديمة فزوجها "ملاّخ" ذهب لتوه إلى صلاة العصر وتركها عند نصبته وقفت السيدة المناضلة أمامها وشرحت على مدى نصف ساعة مقررات مؤتمر بيكين وما انتهى إليه مؤتمر القاهرة للسكان ومزايا الثورة الفرنسية ..وحدثتها طويييييييلاعن فلسفة ما بعد الحداثة..و..و..بعد نصف ساعة استوقفتها زوجة الإسكافي سائلة:
*إنت جيتي من تونس العاصمة
*أي نعم
*ثماش أخبار على المُسْمَارْ؟
*مسمار شنو!!!
*المسمار اللي يملخوا به الصبابط قالوا باش يزيدوا فيه ؟؟؟ومشني عارفة عاد باش يزيدوا فيه الكل وإلا كان في المسمار لِخْشِيْنْ..ربي يستر كان زادوا حتى في المسمار الرقيق تقطعت خبزتنا وخايفة لا الهادي راجلي يزيد يرجع لليبيا ويقعد خمسة سنين ما يجيش كيف المرة الأخرى...ربي يقدر الخير وبرا.

بركات السيدة بيكين
لسان حالهن ولسان حال من على حالهن ولسان من يدور في فلكهن يقول آه لو تم توقيع وتفعيل كل هذه اللوائح المنبثقة أصلا عن وثيقة مؤتمر بكين وخاصة فقرة الحقوق الجنسية "التي تدعو لإباحة الإجهاض والبغاء والشذوذ الجنسي وتشجيع الإباحية" لكنا الآن في حال آخر: لانخفضت الأسعار واختفت الجريمة وغابت الرشوة والمحسوبية إلى الأبد ولكنا ننعم الآن بحرية التعبير وحرية التنظّم ولكان الإعلام شغله الشاغل المواطن وهمومه وانتهى استغلال المرأة في جسدها وفي جهدها ولاختفى الاحداث من ورش السيارت وازدانت بهم المدارس ولولى أجر السبعين دينارا ولكان الأجر الأدنى مليون وزوز ملاين بخلاف منحة الإنتاج وفلوس الذراري ..لو انتبهنا منذ 1995 وفعّلنا مقررات بيكين بفقرتها "الساحرة" لتداول منذ ذلك الحين ثلاثة رؤساء على البلاد ولدمرنا كل السجون وأبدلناها بالحدائق الغناء ولامتلأت هذه الحدائق بالصالحة وبرنية وعيشة والهذبة وزعرة والعكري اللواتي أزحن حزم الحلفاء من على ظهورهن وتركن مقاعدهن في معامل الخياطة وألقين صناديق الطماطم وغادرن الحقول القاسية وتخلصن من أطباق الملسوقة والمعدنوس ودخلن هذه الحدائق للترويح بعد أن رمين لباس الروبافيكا...وهاهي برنية وقد اختفت الأورام من أقدامها والتأمت الجراح الغائرة المعبأة بالأتربة القديمة قدم شقائها وشقاء أمها وجدتها .. هاهي تتهادى خلف إبنها المندفع فوق أعشاب الحديقة وقد أصبحت أقدامها ناعمة تطأ الورد فلا تؤلمه تكسوها ثياب فاخرة من حرير مشربة بخمائل يداعبها النسيم فتلّوح للزهور الناعسة فوق حلة خضراء زاهية.. ورأس الصالحة الذي عشش فيه الهم سنين عددا ، هاهو تعلوه قبعة بنفسجية تخللتها خيوط برتقالية لتفسح مسارب لأشعة الشمس حتى يختم الجمال على المشهد..تلك الهذبة تسرع الخطى تدفع العربة التي تبدو مستوردة ورضيعها يداعب حقيبتها اليدوية التي تحتوي على أوراقها والعملة الصعبة وتذاكر السفر إلى مايوركة لقضاء العطلة...وصديقتها زعرة تسبقها مسرعة زوجها عوادي بالخارج كان عوادي في أعقاب توقيع وتفعيل ميثاق بيكين قد ألقى البالة والفاس.. وهاهو أمام الحديقة يستنى في مرتو "مراكي المرسديس".
أما العزوزة نوة فبعد بيكين إرتد إليها بصرها الذي فقدته منذ عشرين عاما وأسنانها التي أتلفها البرد والصقيع أبدلتها بأسنان الذهب والفضة والعاج الخالص وارتدت فستانا للسهرات وحذاء الكعب العال وعلقت في جيدها سلسلة غليظة من الذهب البراق وبدل العزوزة نوة كتب فوق الصفيحة "النّو"..
أه لو وقعنا وفعلنا وثيقة "الجسد" لفاقت البحبوحة كل الحدود و الإحتمالات وعم السلام والوئام ربوع الوطن فهاهو خروف صغير أمو من باجة وابيو من جندوبة يداعب الذئب ويقفز حوله والنعجة تنهره أخطى عمك خلي يرتاح ، أما الكبش فقد عاد مسرعا إلى المحل نسى سطوشو فوق الكونتوار عرضو برشني في الطريق جايب هولو. الثقة عَمَّتْ البلاد والبراشن والعباد.. والنعجة في خفة ونشاط أنهت المشوي وقدمته للذيب والذيب يقول خوك فيجيتاريا مانكلش اللحم كان ثمة شوي سلاطة وإلا خليني نبات خفيف ، وهذا بورقيبة اليد في اليد مع صالح بن يوسف يتنزهان في جبال طبرقة ومن خلفهما لزهر الشرايطي ينادي استنوا عاد راهو الصباط يزلق، وهذا زرق لعيون يحتضن صالح بن يوسف ويقول وْرَاسْ وْلِيدَاتِي يا سي صالح ما كنت حَابْ إنْظُرَّكْ حَبِيْتْ إنْرَعْشِكْ شْوَيْ جِتْ فِيكْ...لا تستغرب من هذه الحركية الكبيرة أولئك بنو زيد يجهزون الوليمة فالقبائل بدأت تتوافد منذ الفجر من كامل أقطار الجمهورية للإحتفال.. لقد عاد الدغباجي ..لم يستشهد إنما كان بْرِيْزُونِي وبعد تفعيل وتوقيع اللوائح عاد... هو الآن في الحوش يقلب في الذكريات مع البشير بن زديرة ، وعلى بن غذاهم على يمينه يتحسس ذراعه الذي داعبه منه الدغباجي ويقول الله يهديك يا الدَّغْ هاك خليتلي بقعة زرقة..الدغباجي من قْبَلْ معروف لِعْبُوا خَايبْ أسهلو عليه الفرانسيس!!!
هذه قطرات من بركات بيكين فحي على النضال.. اليد في اليد نخرج مهاجرين إلى الصين ومن مات في الطريق الله وحده أعلم بأجره على من وقع.

هل من وقفة تأمل؟؟؟
بلد مثل تونس يأنس فيها الضيف والعابر والزائر فكيف لا يأنس أهلها بعضهم ببعض وهذا المطلوب والمفروض والممكن إن ابتعدنا عن تجذيف الإتجاه المعاكس وإذا ما توفرت إرادة صادقة للتخلص من لمم النضال ودخلنا في عمقه وإن تخلت كل الأطياف عن رؤية الزاوية الواحدة وعَدَّلت بصرها الذي يعاني من خلل مدمر، فعين تسكنها زرقاء اليمامة والعين الأخرى مطموسة مظلمة لا تملك حتى البصيص، على الكل ان يقوم بمراجعات يعدل فيها بصره ليستوي حظ العينين هنا زرقاء وفي الاخرى اليمامة،حتى يرى الكل من حوله وما حوله ولا يتجاهل هذا ذاك وتلك هاتيك وهؤلاء أولئك.

العزيز نصر الدين

شكرا لك صديقي، رغم معاناتي في فك العامية

ولكن اشتغالك بمثل هذا النفس والاحكام امتعني


مودتي