لكلام معنى....

موضوع: لكلام معنى.... 25/11/2009, 10:47

الْحَلْ للِّي عْلِيهْ نْقَلَّبْ
لْگِيتُو مَرْبُوطْ بْقَنَّبْ
وللِّي رَبْطُو..
وَاحَدْ مَنْ النَّاسْ
مَا عَنْدُو سَاسْ وَلا رَاسْ
خَلِّيتُو مَرْبُوطْ ومْشِيتْ...

وبْقَى عَقْلِي مْعَاهْ
الذَّاتْ غَادَة وَتْهَرْوَلْ
ولَعْقَلْ مْعَ الْحَلّْ.. يِوَاسِيهْ
يْقَلَّبْ لُو عْلَى حَلّْ

للِّي رْبَطْ الْحَلّْ..
رْبَطْ حْتَى لَعْقَلْ
لا حَلّْ.. لا عْقَلْ

رْجَعْتْ نْقَلَّبْ عْلَى عَقْلِي
لْگِيتُو مَرْبُوطْ
بْلا قَنَّبْ.. بْلا سْنَاسَلْ

بْرَكْتْ نْخَمَّمْ.. بْلا مَا نْفَكَّرْ
حِيثْ لَعْقَلْ للِّي نْفَكَّرْ بِيهْ..
مَرْبُوطْ تَحْتْ كَرْمَة
مَا عَنْدْهَا ظَلّْ
مَا لْگِيتْ حَلّْ

والْحَلّْ أَرَاسِي رَاهْ مَرْبُوطْ
ولَعْقَلْ للِّي يِفُكّْ الْحَلّْ
مَرْبُوطْ..
والرُّبْطَة زُغْبِيَّة..
والزُّغْبِي هُوَ أَنَا
وشْحَالْ بْحَالِي مَنْ زُغْبِي
للِّي مَا عَنْدُو عْقَلْ

فِطْرِيقُو مَا صَابْ حَلّْ
عَقْلُو يْدَوَّرْ عَلْ الْحَلّْ..
بْلا عْقَلْ
گَال لِي وَاحَدْ..
الْحَلّْ مْعَلَّگْ فْهَجْهُوجْ گْنَاوِي
كَانْ سَاكَنْ فْمَرَّاكَشْ
وللصّْوِيرَة رَاهْ تْحَوَّلْ
وُبَالْأَمَارَة إلى تْلَفْتِي..
لا تْسُوَّلْ

خَلِّيكْ هُكَّاكْ..
والذَّاتْ غَادَة بْلا عْقَلْ..
گَالْ للِّي وَاحَدْ آخُرْ :
الْحَلّْ عَنْدْ مُولا تَسَّاوَتْ
رَاهْ يْفُكّْ كُلّْ مَنْ هُوَ مْسَنْسَلْ
هَزِّيتْ الزّْيَارَة لْبُويَا عُمَرْ
لْگِيتْ فِيهْ
شْحَالْ مَنْ وَاحَدْ بْلا عْقَلْ
كَيْقَلَّبْ عْلَى حَلّْ
لَكْشَاكَشْ خَارْجَة مَنْ لْفَّامْ
الرَّجْلِينْ ولِيدِّينْ مَرْبُوطَة
ولَعْقَلْ يْجِيبْ الله
غِيرْ سْبُوبْ الطَّالَبْ ولَفْقِيهْ..
وُالجَّدْوَلْ

شَايْلَّاهْ أَبُويَا عُمَرْ
طَالَبْ التَّسْلِيمْ..

مَا بْغَيْتْ حَلّْ..
مَا بْغَيْتْ عْقَلْ

وهَاذْ الشِّي مَا كُنْتْ عْلِيهْ مْعَوَّلْ
شْدْنِي وَاحَدْ عْمَا
وسَارْ يَقْرَا لِي فْكَفِّي :
اللِّيلْ رَاحْ..
ومَالْ گَلْبَكْ مْهَوَّلْ
السَّعْدْ مَلْيُوحْ.. فْحُفْرَة
واللِّي حْفَرْهَا مَا فِيهْ رَحْمَة
وعْلِيهْ لا تْعَوَّلْ..

ارْجَعْ مْنِينْ جِيتِي
الْحَلّْ للِّي عْلِيهْ تْقَلَّبْ..
ادَّاوْهْ مْوَالِينْ لَعْقَلْ

زْمَانْ أَوَلْدِي..
مَلِّي كَانْ التْشَامِيرْ..
كْسَاتْ بْنَادَمْ..

مَلِّي كَانْ لَحْصَادْ فْوَقْتُو..
مَلِّي كَانَتْ الْبَغْلَة بْلا ڤِيتَاسْ..

مَلِّي كَانْ الْمَجْدُوبْ يْگُولْ كْلامُو..
مَلِّي كَانَتْ الْعَيْطَة..

تَجْرِي عَلْ الاسْتِعْمَارْ..
مَلِّي كَانُو جْدُودَكْ..
يْخَرْجُو فِالْبَارُودْ..

مَلِّي كَانْ عبد الكريم الخطابي..
يِصَيَّحْ فْلَجْبَالْ..

مَلِّي كَانَتْ واد زم..
غِيرْ الزْنَاقِي تْجْرِي بالدَّمْ..

مَلِّي كَانْ الْحَيْكْ وَاللّْثَامْ..
وَالسّْلامْ لِيهْ مَعْنَى..

مَلّْي كَانُو عْبِيدَاتْ الرّْمَى..
يِدَزُّوا لَكْلامْ.. مْعَانِي وقْوَافِي

مَلِّي كَانْ الْعَوْدْ الْبَرْگِي..
يْشَگْ الظّْلامْ

مَلِّي كَانَتْ النْسَا..
تْكَحَّلْ عَيْنِيهَا بِالْبَارُودْ..

والرْمُوشْ..
مْكَاحَلْ فَالسّْمَا دَاوْيَة

مَلِّي كَانَتْ لَقْبَايْلْ..
تَكْتَبْ "النَّصْرْ" بْلُغَة مْوَحْدَة

مَلِّي كَانْ المَهْرَازْ يْدُگْ الْحَنَّة..
فْكْفُوفْ الْعَزْبَة..
تَقْرَا الْمَعْنَى

مَلّْي كَانَتْ الشَّاوِيَة وَرْدِيغَة..
امْحَارَكْ صَادَّة لَعْدَا

مَلِّي كَانْ دَمْ الشُّهَدَا..
يْحَرَّرْ تْرَابْ بْلادِي..
تُرْبَة.. تُرْبَة
مَنْ لُوطَة..
... لْجْبَالْ الأَطْلَسْ.

موضوع: رد: لكلام معنى.... 25/11/2009, 17:01

الصديق الزجال سي محمد مومر

يسرني أن أكون أول الموقعين على هذه اللوحة الشعرية الرائعة .. حروف ذات معنى واضح وتصورات فنية لماض قد ولى واصبح في خبر كان.
دمت مبدعا وبارعا في نقش الحروف
عيد مبارك سعيد

مودتي وتقديري

» برنامج مجمع لكلام يحتفي بعرصة لكلام
» مغازل لكلام
» طريق لكلام
» عرام من لكلام... و فين السامع؟
» ديوان عرصة لكلام من حلم الى حقيقة