رحيل الشاقي....

موضوع: رحيل الشاقي.... 30/10/2009, 17:50

رْحِيلْ الشَّاقِي

سُوَّلْتْ الْغَادِي..
جَاوْبْنِي الجَايْ بَلْسَانْ الْغَادِي
رْحِيلْ الشَّاقِي..
طْرِيقُو حَنَّاتَة
مَا تْآمَنْ بالْمَكْتُوبْ
تْهَبّْ ارْيَاحُو بارَبْعَة
وگَلْبْ السّْبُولَة قَطْرَانْ
وصْبَاعْ رَجْلِيهْ..
وتَادْ الْخَيْمَة الْمَنْسِيَّة
وسْوَاعْدُو..
فْتِيلْ الشَّمْعَة الْمَحْگُورَة
طْفَاتْهَا لَحْلامْ
ورْحِيلْ الشَّاقِي..
بَاقِي..
وسْنِينْ ايَّامُو..
مَنْجَلْ حَافِي
صْفَايْحُو..
دَابَتْ بْصَهْدْ لَهْوَالْ
والتَّنْهِيدَة فَجْفَانُو
غْمَامَة.. رْعَدْهَا..
فاعْمَاقُو دْوَاتْ
بالسَّرْ بَاحَتْ
بْكَا الْمَا فْجُوفْ الأَرْضْ
وغَرْبَتْ الشَّمْسْ بْلا وَقْتْ
ودَابْ الثَّلْجْ فِشْتَاهْ
وَلْدَتْ الْحَامْلَة فَشْهَرْهَا السَّابَعْ
ولَحْضَانَة السّْبَاعِيَة..
فْرَاخْهَا طَارَتْ فِسْمَاهْ

موضوع: رد 30/10/2009, 19:43

نص يغري بالتفاعل الفني مع صوره الناطقة
بحكم لمعانيها مستوى فني جميل ...
تحيتي الفنية