مَنْظَرْ غْرِيبْ فحَدّْ ذَاتُو، التَّنَاقُضْ مْرَبَّعْ عْلَى بَرَّادْ دْيَالْ أَتَايْ، يَلْعَبْ فضَامَة بْحَالْ ذُوكْ النَّاسْ الشِيَّابْ للِّي خْدَاوْ التَقَاعُدْ،
النّْهَارْ ومَا طَالْ وهُمَا يْلَعْبُو فضَامَة، غِيرْ لَبْيَادَقْ وسِيرْ تْضِّيمْ، گْلُوبْهُمْ مْسَاكَنْ عَامْرَة بالضِّيمْ والْحُگْرَة، مَنْسِيِّينْ فالدَّنيَا.. عْيِيتْ وضَرُّونِي رجْلِيَ، بْغَيْتْ نْرَيَّحْ فقْهَيْوَة، السَّاعَة الله غََالَبْ، مَا عَنْدِيشْ لَفْلُوسْ، گُلْتْ نَبْرَكْ فجْرَيْضَة، نَرْتَاحْ شْوِيَّة مَنْ عْيَا الطّْرِيقْ وهَمْ النَّاسْ، للِّي بَكَّانِي وجْرَحْ الْگَلْبْ بلَفْقَايْسْ ولَغْدَايْدْ.. بْرَكْتْ ودَرْتْ رْجَلْ فُوگْ رْجَلْ وبْدِيتْ كَنْشُوفْ
فجَّرْضَة مَسْكِينَة، حَالَتْهَا حَالَة، رِيحَةْ الْبُولْ عَاطْيَة مَنْ بْعِيدْ.. وَاحَدْ الرَّاجَلْ شِيبَانِي بْرَكْ حْدَايَا.. گَالْ قْبَلْ مَا
يَبْرَكْ :
- آحْ الله مِّيمْتِي.. الله.. الله..
وانَا نْگُولْ فخَاطْرِي:
- إِيهْ عْلِيكْ آلصَّحَة الْغَدَّارَة
جْبَدْ وَاحَدْ الْمِيكَة صَفْرَة وبْدَا كَيْنَفَّحْ.. السّْطَرْ الأَوَّلْ، السّْطَرْ الثَّانِي.. وهُمَا يْدُوزُو شِي بْنَاتْ مْزَيْرَاتْ فسْرَاوَلْ دْيَالْ
الدّْجِينْ.. بَّاطْهُمْ عَرْيَانَة.. وكْتَافْهُمْ عَرْيَانَة.. دَايْرَاتْ الْمَاكْيَاجْ لَمْعَيَّقْ.. وهُوَ يْگُولْ الشِّيبَانِي:
- آلْمْسَخْ.. لَمْسَخْ هَذَا..
وهُوَ يْسَطَّرْ السّْطَرْ الثَّالَثْ يْبَرَّدْ بِيهْ الْكِيَّة، وبْقَا مْتَبَّعْ الدَرِّيَاتْ وهُمَا غَادَاتْ گَاعْ مَا مْسَوقِينْ لْهَاذْ الدَّنْيَا.. خَلِّيتُو ومْشِيتْ
نْجُرْ فرَجْلِيَ، رْجَلْ تَابْعَة رْجَلْ، خَطْوَة عْلَى خَطْوَة.. گُدَّامِي جُوجْ دْيَالْ الشُبَّانْ كَيْهَضْرُو.. جَا فوَدْنِيَ كْلامْ الأَوَّلْ :
- سَايْرِينْ كَنْقُتْلُو فالْوَقْتْ
هَكَّاكْ.. جُوجْ دِيبْلُومَاتْ، والْخَدْمَة مَا كَايْنْشْ.. دَخَّلْتْ عْلِيكْ بالله آصَاحْبِي آشْ غَادِي نْدِيرْ؟..
جَاوبُو الثَّانِي:
- دَابَا يْفَرَّجْ الله.. گَاعْ لا تخَمَّمْ.. هَاذْ شِّي للِّي عْطَا الله
رَدْ عْلِيهْ الأَوَّلْ:
- عْلاشْ للِّي مَا نْخَمَّمْ،
وشْبَابِي كَيْضيِعْ.. بْغَيْتْ نَحْرَگْ للطَّالْيَانْ.. اللَّهُمَ قَطْرَانْ بْلادَاتْ النَّاسْ، ولا هَاذْ لَعْسَلْ الْمَفقُودْ فبْلادِي وقَفْتْ بَاشْ نَقْطَعْ
الشَّانْطِي.. وگُلْتْ فْخَاطْرِي :
- إِيهْ.. للِّي مَا عَنْدُو هَمْ، عَنْدُو هْمُومْ، وكُلْ زْبِيبَة فْرَاسْهَا عُودْ.. آشْ نْگُولْ أَنَا وَاشْ يْگُولُو هُمَا؟ خَلِّيهَا عْلَى الله.
أَذَّنْ آذَانْ الْمَغْرَبْ :
- الله أكبر، الله أكبر..
گُلْتْ الْمَغْرَبْ هَذَا، ويَالاهْ نَطْلَعْ فْحَالِي للدَّارْ، ضَرْنِي الجُوعْ وعْيِيتْ بكَثْرَةْ مَا شَافَتْ عَينِي ومَا سَمْعَتْ اوْذَانِي مَنْ هْمُومْ مَرْسُومَة فوْجُوهْ النَّاسْ.. بْدِيتْ غَادِي والنَّاسْ جَايَّة وغَادْيَة، شِي مَا يَدِّيهَا فحَدْ.. كُلْ وَاحَدْ قَاصَدْ بَابْ دَارُو.. للِّي مْصَوَّرْ
عْشَاهْ، وللِّي غَادِي يْبَاتْ بْلاشْ.. وْصَلْتْ للدَّارْ، لْگِيتْ الْوَالِدَة مْطَيْبَة لَعْدَسْ، ورِيحَةْ الثُومَة كَتَضْرُبْ للنِّيفْ.. سَلَّمْتْ عْلِيهَا، وكِيفْ الْقَاعِدَة كْلامْ البَارَحْ كِيفْ لْيُومْ.. ونْعَاسْ الْبَارَحْ كِيفْ لْيُومْ.. لَفْرَاشْ حْزِينْ والْكَاشَّة غَامْلَة، عْيَاتْ مَنِّي ومَنْ رِيحْتِي، وهْمُومِي والتَّنْهِيدَة للِّي طَالَتْ عْلَى فْرَاشْ النِّسْيَانْ. فَقْتْ الصْبَاحْ.. فْطَرْتْ وخْرَجْتْ فِينْ؟ الله أَعْلَمْ.. لْيُومْ غَادِي نَشْرُبْ قْهَيْوَة كْرِيدِي والدِّيطَايْ كْرِيدِي عَنْدْ الْگَارْسُونْ صَاحْبِي.. وَانَا فطْرِيقِي شَفْتْ الرَّاجَلْ شَادْ ولْدُو صْغِيرْ كَيَضْرُبْ فِيهْ..
- مَا بْغَيْتِيشْ تَقْرَا؟ بْغَيْتِي تُخْرُجْ
شَمْكَارْ؟ السَّلْگُوطْ لاخُرْ. الدَّرِي مَسْكِينْ بَالْ فسَرْوَالُو بكَثْرَةْ التّْصَرْفِيقْ والضَّرْبْ.. گُلْتْ فخَاطْرِي:
- طَفْرُوهْ حْتَّى هَاذُوكْ للِّي قْرَاوْ!
ومْشِيتْ نَتْسَابَقْ مْعَ خَطْوَاتِي للقَهْوَة بَاشْ نْحُلْ عَيْنِيَ.. شْرَبْتْ قْهَيْوَة كَحْلَة وقْرَيْتْ الجُّورْنَالْ الْمُعْتَادْ، وبطَبِيعَة لْحَالْ جُوجْ گْوَارُّو مَارْكِيزْ، گَادُّو لِيَّا لَمْزَاجْ، وبْدِيتْ كَنْشُوفْ بْعِيدْ مَلِّي سْرَحْ لِيَّا النِّيكُوتِينْ فعْرُوقْ الدّْمَاغْ لَمْزَعْزَعْ فهْمُومْ حَالِي..
وَانَا خَارَجْ مَنْ القَهْوَة، شَفْتْ وَاحَدْ الرَّاجَلْ كَيَهْدَرْ غِيرْ وَحْدُو.. بَايْنَة عْلِيهْ إنْسَانْ مْثَقَّفْ، لابَسْ مَزيَانْ، السَّيَدْ مَسْكِينْ سَارَحْ حْرُوفْ لَكْلامْ الْمَارَّة، الْحَارَّة.. عَيْنِيهْ كَيْشُوفُو وهُوَ مَا شَايَفْ وَالُو.. ولَكِنْ كَيْشُوفْ عْمَاقْ الرُّوحْ كَتَغْلِي، والنَّفْسْ رَابُوزْ حَدَّادْ كَيْسُوطْ عْلَى نَارْ گَادْيَة فِيهْ.. خْرَجْتْ مَتْأَلَّمْ، وفالْبَابْ تْلاقَانِي السِّيرُورْ :
- تْسِيرِي؟
مَا هْدَرْتْشْ مْعَاهْ.. بْدِيتْ غَادِي، فِينْ؟ والله مَا عَارَفْ.. غَادِي وصَافِي، صَبَّاطِي رْكَبْ ريِحْ الشَّارِعْ، وبْدَا غَادِي وَانَا تَابْعُو، ومْعَ الدَّوْرَة تْلاقَانِي رَاجَلْ كْبِيرْ فِيْدِّيهْ رَابُوزْ دْيَالْ الضِّيقَة.. وگَالْ لِيَّا :
- عَاوْنِّي بَاشْ نَشْرِي هَاذْ الدّْوَا دْيَالْ الضِّيقَة
جَاوْبْتُو :
- الله يْسَهَّلْ، والله مَا عَنْدِي.. انْتَ خَاصَّكْ رَابُوزْ دْيَالْ الضِّيقَة، وَانَا خَاصْ مَنْ يْفَاجِي عْلِيَّا هَاذْ الضِّيقَة للِّي رَانِي فِيهَا.
ومْشِيتْ، مَرَّة نْشُوفْ گُدَّامِي، مَرَّة نَتْلافَتْ وْرَايَا.. ومْعَ التّْلافِيتَة، سْمَعْتْ الْغَوْتْ دْيَالْ وَاحَدْ البَنْتْ كَتَبْكِي وتْگُولْ:
- شَفَّارْ.. شَفَّارْ..
وَقْفُو حْدَاهَا النَّاسْ، كلْ وَاحَدْ كَيْسَوَّلْ مَالْهَا، وهِيَ مَذْهُولَة فِيهُمْ..
- بُورْطَابْلِي.. بُورْطَابْلِي.. الشَفَّارْ خْوَنْ لِيَّا بُورْطَابْلِي، يَالاهْ كِيفْ شْرِيتُو.. بَاقِي جْدِيدْ
گَالْ لِيهَا وَاحَدْالسَّيَدْ :
- دِيكْلارِي عَنْدْ البُولِيسْ
دْمُوعْهَا مَسْكِينَة يْطِيحُو كِيفْ لَحْجَرْ.. وَاحَدْ آخُرْ گَالْ لِيهَا :
- اتِّصَالاتْ ولا مِدِيتِيلْ؟
مَا جَاوْبَاتُوشْ.. سُبْحَانْ الله شْحَالْ بْقَاتْ فِيَّا، وبْقَاوْ فِيَّا هَاذُوكْ للِّي كَيْسَوّْلُو فِيهَا، بْحَالْ للِّي رَاهُمْ بُولِيسْ كَيْسَوْرْطُو فِيهَا..
أَسْئِلَة كَتْمَرَّضْ الصّْحِيحْ فصَحْتُو، وتْزِيدْ هَمْ الْمَهْمُومْ.. گُلْتْ آجِي نَمْشِي فحَالِي، زَدْتْ وَاحَدْ مِيْتِينْ مِيتْرُو، بَانَتْ لِيَّا
الجُّوقَة گُدَّامْ وَاحَدْ القَهْوَة، قَرَّبْتْ لْقَِيتْ النَّاسْ مَجْمُوعِينْ عْلَى بَرَّا.. والدَّاخَلْ عَامَرْ، ورِيحَة كْرِيهَة خَارْجَة مَنْ الْقَهْوَة، رِيحَةْ الدُّخَانْ والصّْنَانْ والصّْبَابَطْ.. هُومَا گَاعْمَا مْسَوّْقِينْهَا، وعْقُولْهُمْ مْعَ الْخَيلْ، التِّيرْسِي والكْوَارْطِي.. هَذَا طُوكَالْ، هَذَا فَاڤُورِي.. گُلْتْ فخَاطْرِي :
- هَذَاكْ للِّي خْوَنْ
الْبُّورْطَابَلْ دْيَالْ ذِيكْ الْبَنْتْ مَسْكِينَة، رُبَّمَا مَبْلِي بالتِّيرْسِي.. غَادِي يْبِيعُو ويْجِي يَلْعَبْ نْوِيمْرَاتْ. مُجْتَمَعْ غْرِيبْ،
نَتْأَسَّفْ ولا نَمْشِي فحَالِي؟ ذَاكْ الشِّي للِّي كَاينْ.. سَدِّيتْ دّْجَاكِيطَا عَلْ لْبَرْدْ وشَبَّرْتْ طْرِيقِي.. فِينْ؟وَصّْلُونِي رَجْلِيَا
للْمُوقَفْ، هَا الصَبَّاغَة، هَا لْبْلُومْبِيَا، هَا البَنَّايَا.. گَاعْ صْنَايْعْ بْلادِي تْجَمْعَتْ ودَايْرِينْ وَقْفَة اعْوِجَاجِيَة.. حَالَتْهُمْ تْبَكِِّي لْمِيَّتْ وتْشَفِّي لَعْدَا فِينَا.. شَفْتْ وَاحَدْ مَنّْهُمْ حَاطْ دَكَّة دْيَالْ أَتَايْ مَا عَنْدْهَا لُونْ، مْشَعَّلْ گَارُّو كَازَا سْبُّورْ، بَارَكْ عْلَ لْعَدَّة (الدُّوزَانْ) وسَارَحْ فْدُرُوبْ الْخَيَالْ، يَتْسَنَّى فْشِي هَمْزَة ولا شِي بْرِيكُولْ، عَقْلُو تَالَفْ فالتَّفْكِيرْ لَعْمَى، يْسُوَّلْ رَاسُو ويْجَاوْبْ عْلَى رَاسُو.. رْكَابِيهْ عَنْدْ سَدْرُو.. ومَرَّة مَرَّة يَشْرُبْ الدَكَّة يَقْطَعْ بِيهَا دُخَانْ كَازَا سْبُّورْ.. شْوِيَة هُوَ يَطْفِي الْگَارُّو فلأَرْضْ ودَارُو فْجِيبُو.. غَ قَجُّو.. وخَلا مَا يَكْمِي مَلِّي يْضِيقْ بِيهْ الْحَالْ.. هَذَا سُؤَالْ كْبِيرْ، شْكُونْ يْجَاوْبْ عْلِيهْ؟ الْمَكْتُوبْ ولا الْقَدَرْ ولا الْمَسْؤُولِينْ ولا.. وفِي الْجِهَة لأخْرَى شَبَابْ ضَايَعْ كَيْبِيعُو السِّيدِيَاتْ لَمْقَرْصْنِينْ.. گُلْتْ فْنَفْسِي:
- شْكُونْ للِّي ضَايْعْ؟ هَاذْ الشَّبَابْ ولاالْفَنَّانَة؟
يَمْكَنْ بْحَالْ بْحَالْ.. هَاذُوكْ يْغَنِيوْ بَاشْ يْعِيشُو، وهَاذُو يْقَرْصْنُو بَاشْ يْعِيشُو.. بْجُوجْهُمْ ضَايْعِينْ، والزّْمَانْ مَا كَيَرْحَمْشْ.. وشِي مَا كَيَرْحَمْ شِي، والْقَانُونْ مَا كَيَرْحَمْ حْتَى وَاحَد، غِيرْ السِّينِمَا أَبْطَالْهَا نَاسْ الْمُجْتَمَعْ فالْبِدَايَة والنِّهَايَة.. وشْحَالْ گَدَّكْ تْشُوفْ مَنْ كُلْ فَنْ طَرَفْ.. ومَنْ كُلْ شَجْرَة غْلَّة كَارْمَة، وشْحَالْ گَدَّكْ تَسْمَعْ.. مَنْ كُلْ لْسَانْ كْلامْ.. ومَنْ ْكُلْ گَلْبْ دَقَّة حْتَّى يَحْمَى الطُّرْحْ. شْويَّة وانَا نَسْمَعْ السَبَّانْ والْمَعْيُورْ :
- سِيرْ الله يَنْعَلْ للِّي مَا يَحْشَمْ
يتبع